Hopin Muklum kata Wan n sadi ai majaw, dum n ta 5 hkru hten hkrum wa ai lam, Hopin ginra masha ni tsun ai re.
Mana de Hkying 4 aten daram hta Hopin Myoma Dingda ဇမ္ဗူရာဇ် hpri rai dut ai seng kaw na hkru hpang wa ai gaw, makau grup yin na dum n ta 4 hkru hten lawm mat ai lam ginra masha langai KNG de tsun dan ai re.
“ဇမ္ဗူရာဇ် ကုန်မာဆိုင် ဂိုဒေါင် maga de na hkru hpang wa ai re nga tsun ai, maram yu yang dai Gu Dawng kaw Datsi sau bang da sai ai, dai kaw na wan hkut achyang re shawng le wa ai, dai kau na makau hkan na n ta de mung hkru kap wa ai majaw, n ta 5 hkru lawm mat ai ga rai nga ai,” nga tsun dan ai.
Mana de wan hkru hpang wa ai gaw, ဇမ္ဗူရာဇ် hpri rai dut ai seng ni a ဂိုဒေါင် kaw bang da ai Dat si sau kaw na hkru hpang wa ai majaw, Wan grai laja ai nga, Hopin ginra masha ni tsun ai re.
Hkying 4 jan kaw na hkru hpang wa ai Wan hpe Hkying 5 chyen ten daram hta sat kau lu sai rai tim, Nbung ja ai majaw, makau dum n ta ni de hkru kap lawan ai majaw, dum n ta 5 hkru hten lawm mat ai mung rai nga ai.
Wan hkru ai shara hpe Hopin Namma mare hkan na Wan sat mawdaw hte, Mung Shawa n gun kaba the jawm sat wa ai lam chye lu ai.
Mana Wan hkru ai hta, Masha hkra hkala ai lam gaw hpa n nga ai rai tim, n ta 5 na arung arai hte ဇမ္ဗူရာဇ် gunrai seng kaw na, gat rai ni yawng hkru hten lawm mat ai hpe chye lu ai.
Myen Mungdan kata n dai Shata 5 laman hta Wan n sadi ai majaw, dum n ta hkru hten hkrum ai amu mang hkang 610 lang nga wa ai nga, Myen Mung Wan sat dap kaw na n dau da ai re.
Lai was ai 2024 ning hta gaw, Myen mung dan ting hta 1150 lang hkru hten wa ai kaw, Masha marai 99 si hkrum nna, marai 138 hkala hkrum wa ai lam matut tsun da ai re.