Lang Se hte Hkawnglanphu lapran Lahe Sin Post shara de Myen Myen Hpyen dap hte Pyithutsit ni hpyen n gun hte htu lung wa ai majaw, Majan byin taw ai n htoi 3 ya du wa nga sai lam ginra masha ni kaw na chye lu ai.
Ya gap gasat nga ai shara de, Danggu Dang Pyithutsit Hpung ni htim gasat sa wa ai kaw na majan byin hpang wa ai gaw, dai ni du hkra naw gap gasat hkat taw nga ai lam KPF na lit nga ai ni KNG Shiga de tsun dan wa ai re.
“Lang Se lai kaw na, anhte a hpang jahtum Ninghkap shara shatai da ai, Lahe Sin post de A Dang Pyithutsit hpung ni htu lung wa ai majaw, Majan byin taw ai rai nga ai,” nga nna tsun dan ai re.
Ya majan byin nga ai shara gaw, lai wa sai Shaning ningnan ten laman KIA KPF pawng hpawm dap ni htim gasat zing da ai Lahu Se Pyithutsit dap shara makau kaw re lam chye lu ai.
Lahu Se Pyithutsit dap shara lawu Yan Ma mare kaw, Dang Gu Dang Pyithutsit ni nga ai shara rai nna, Dai Pyithutsit dap shara kaw, Malu masha laknak ni mahkawng nna, Lahu Se dap shara hpe htim gasat wa ai majaw, majan byin taw ai lam re nga, KPF na lit nga ai Salang wa matut tsun tawn ai re.
Lang Se Mare hpe Myen Hpyen dap maga Jet Nbungli bawm wa jahkrat bun ai majaw, Mung Shawa marai 2 si hkrum wa ai lam matut chye lu ai.
Dai na de September 22 ya shana maga hkying 2: 25 Pm aten, Mandalay na lung wa ai Jet Nbungli Lang Se mare na Mung Shawa dum n ta kaw wa jahkrat bun ai majaw, Num 1, La 1 si hkrum wa ai lam, ginra masha ni tsun dan wa ai re.
Ya majan byin taw ai Lahu Se dap shara gaw, Hkawng Lan Phu Lang Se lam lapran na dap shara rai nna, Ya majan byin taw ai shara hte Lang Se mare gaw, Deng 100 jan daram naw tsan ai lam matut tsun dan wa ai re.
“Ya Majan byin ai shara gaw, Langse hte grai naw tsan ai Deng 100 daram she n rai na i? Sengke hte sa tim pyi hkying hkum 6 ram jawn ra ai mi gaw,” nga tsun ai re.
Lahu Se post kaw gap gasat hkat nga ai hta, Pyithutsit dap maga na shamu wa yang KPF maga na hkap shingla gasat ai majaw, Pyithutsit ni n lu shamu ai sha, laknak kaba the gap shapyen bun hkat na majan byin taw ai lam mung rai nga ai.
A Dang Pyithutsit hpung ni Lang Se ginra hpe bai up madu mayu nna, Myen Hpyen dap hte pawng nna, Lang Se ginra hpe htim gasat na hkyen shajin taw ai masa mung rai nga ai.
Ya n dai laman Majan byin taw ai shara gaw, Lang Se hte Deng 100 hkawt daram naw tsan ai shara rai nna, Hpyen n’gun mahkawng jat mahkawng jat rai na, Lang Se de du hkra htim gasat yu wa na masa nga ai lam hpyen masa yu maram ai ni tsun tawn ai re.
Ndai laman A Dang Pyithutsit the Myen Hpyen dap ni, Lang Se ginra hpe bai htim gasat na matu, Laknak Machyu Pala ni hte Malu Masha hpai na matu, Mare masha ni yawng hpe n ta langai na langai n sa n mai a tik anang Porter rim lahkawn taw nga ai mung rai nga ai.