Hpakant Ginra kata hta, September 10 ya shana de hkying 3 ram kaw na, shana yuptung hkying 12 aten daram du hkra sinat kaji kaba ngoi ai nga, Hpakant ginra masha ni KNG shiga dap de tsun dan ai re.
Majan byin taw nga ai shara ni gaw, Sharaw Hka, Lagat Kawng, San Chyoi, Sut Bum, ရတနာမြေစာပုံ shara ni hta rai nna, Hpakant Byuha kawng kaw na mana tup laknak kaba gap bun ai nga ginra masha wa KNG de n dai zawn tsun dan wa ai re.
“Mana tup sinat kaji kaba ngoi ai, Kaba ai ngoi dat, kaji ai bai ngoi dat rai shana ting n mai yup ai, jahkring yup mayu wa sai ngu na yup wa yang, laknak kaba bai ngoi sai, bai kajawng rawt, dai hku shana tup yup jang jang kau ai,” nga tsun dan wa ai re.
Myen Hpyen Byuha kawng kaw na, Majan byin ai Lagat Kawng maga de gap bun ai masa re lam chye lu ai.
Lagat Kawng kaw September 9 ya shana maga kaw na laja lana gap gasat hkat wa ai hta, Myen hpyen dap maga sum machyi law da ai shara de Myen ni bai htu lung wa ai majaw, dai makau grup yin hta laja lana gap gasat hkat wa ai mung rai nga ai.
Ya ten Myen Hpyen dap ni gaw, Hpakant ginra kaw Hpyen man 3 hku htu shadut htim gasat taw nga ai re.
Myen Hpyen dap maga hpyen man masum hku na htu shadut taw nga ai majaw, ginra masha law malawng tinang man ang ai shara ni de hprawng yen ma sai re.
Seng Tawng maga de mung majan laja wa na masa nga ai majaw, n dai laman Seng Tawng ginra masha law malawng mung hprawng yen taw sai rai nga ai.
Ya ten Myen HPyen hpung ni gaw, Seng Tawng mare maga de htu shadut htim gasat wa lu na matu, San Chyoi, Mashi Kahtawng shingdu ရခိုင်ကုန်း shara ni hpe laja lana htim gasat taw nga ai mung rai nga ai.
Ya ten Hpakant ginra hta HPyen masa matut shaja hkat nga ding yang re majaw, Hpaji jawng hte Asuya rung ni yawng hpe mung naw pat da ai re.