Myen Hpyen dap ni n dai laman Waimaw Lamyang mare de lagaw lam hte htu lung wa ai Myen Hpyen hpung ni, bai htingnut mat sai rai tim, Nbungli hte gaw shani shagu naw wa gap gasat taw ai lam, Waimaw ginra masha langai KNG shiga dap de tsun dan ai re.
“Ya gaw Lagaw lam hku na htim gasat ai lam gaw n nga ai da. Mana shawngg shana the mani hpawt gaw, nbungli hte grai bai wa gap ma ai, Waimaw Hk.L.Y (58) dap kaw na laknak kaba ni hte mung grai bai gap nga ma ai,” nga tsun ai re.
Ndai laman Myen hpyen hpung ni KIA ni dap jung shara la da ai Lamyang mare de lagaw lam hku htim gasat chyam yu ai rai tim, masan n sa ai majaw, bai htingnut mat ai lam mung rai nga ai.
Ya ten Myen Hpyen dap gaw, Kanpaiti, Chihpwi, Pang Wa ginra yawng hpe bai htim gasat zing madu la lu na matu, Ginjaw ginra hte matut da ai, Waimaw, Lamyang, Washawng, lam mayan hpe n lu yang lu hkra shawng htim gasat zing madu kau nna, laga ngam ai ginra ni de bai htim gasat wa na masa nga ai lam, Hpyen masa yu maram ai ni tsun tawn ai re.
Miwa the India Hpaga gun rai ginlen na matu, Lido lam kaba hpaw na masing mung nga ai majaw gaw, Kanpaiti hpe n lu yang lu hkra htim gasat nna, Mungkan hpaga lawk hta ra ahkyak nga ai, Ga Sau n hprang pru ai ginra ni hpe mung Myen hpyen dap maga na lu hkra bai gasat zing madu la na matu, Mye Hpyen dap the Pyithutsit, BGF dap ni hpyen n gun mahkawng jahting taw nga ai re.
Waimaw Lamyang mare hpe Myen hpyen dap ni n dai laman shani shagu ngu na laknak kaba gap sharu bun taw ai rai nna, KIA dap maga na mung htingnut yen ya ai lam n nga, hkap shingla gasat nga ding yang re lam chye lu ai.