Katha Hka Sanghpaw daru na Myen Hpyen Hka Sanghpawli 5 gaw, Manmaw de bai matut lung wa na matu hkyen shajin taw ai nga, Katha PDF na lit nga ai ni KNG shiga dap de tsun dan wa ai re.
Myen Hpyen Hka Sanghpawli hpung ni gaw, lai wa sai July 17 hte 22 ya shani ni hta Mandalay Sanghpaw daru na rawt lung wa ai Hka Sanghpawli 20 jan hta Tsi mawan Malu Masha hte Hpyen lang arung arai htaw ai Sanghpaw ni rai nna, Malu masha the hpyen lang arung arai htaw da ai Sanghpaw 5 gaw, Katha kaw jahkring kau da ai rai nga ai.
Myen Hpyen Hka Sanghpawli 20 jan Mandalay kaw na rawt lung wa ai ten, lam lapran KIA PDF dap ni a hkap shingla gasat ai lam hpe lang hte lang hkrum sha wa ai re.
Manmaw kaw jahkring kau da ai Hka Sanghpawli 5 gaw n dai laman Manmaw de bai matut lai lung na matu hkyen shajin taw nga ai nga nna, Katha PDF na lit nga ai Magam gun langai KNG shiga dap de ndai zawn tsun dan wa ai re.
“Dai shaloi Sanghpaw 4 ngam kau da ai, dai ngam da ai shaloi gaw, Katha kaw na ra ai a matu shangam kau da ai sha shadu ai. Rai tim ya gaw dai hku n rai taw nga ai, Manmaw de lai lung wa na matu, Zaibru buri ni mada grai hkyen taw nga masai, Hpyen n-gun kalang bai sa ai masa lam re ga rai nga ai,” nga nna tsun dan wa ai re.
Myen Hpyen Hpung ni ngam tawn kau da ai Sanghpaw 4 Manmaw de bai lai lung wa na matu, Katha kaw na mung shawa Hka Sanghpaw langai hpe mung rim shaga da ai lam nga ai hpe chye lu ai.
“Manmaw de du lung mat wa ai Hka Sanghpaw ni mung ndai laman hta bai n htang yu wa na lam shiga ni pru taw ai nga nna,” magam gun ni matut tsun ai re.
Mali hka lam gaw, n dai Shata man 9 htum ai hpang gaw, hka yawm sai majaw, hka lam kaji mat nna, hkawm sa hkawm wa yak wa sana re lam chye lu ai.
Ya ten Myen Hpyen dap ni gaw, Manmaw ginra kata Htawng masha ni hpe shana de du yang, htawng chyinghka hpaw ya nna, mung shawa dum n ta hkan na arung arai ni hpe hkan lagu shangun nna, Hka Sanghpawli n tsa hta hpai bang shangun ai lam ni galaw taw nga ai lam chye lu ai.