Waimaw Lamyang mare kaw, Myen Hpyen dap gap ai lakanak kaba si a majaw, asak 8 ning re ai ma kaji langai si hkrum nna, amyu shayi marai 2 hkala hkrum wa ai lam chye lu ai.
August 31 Laban ya shani, Yi de nga ai Kaji Kawoi yan hpe wa jahkrum nna, bai n htang yu wa ai ten, Nam Wa mare lam kaba makau kaw jahkring wa gan hkring nga ai ten, Myitkyina hkran maga de na gap dat ai ngu maram lu ai laknak kaba langai Shan moi ni masum gan wa hkring nga ai, lam kaba makau kaw wa hkrat ang ai majaw, shan moi ni masum kaw na, kaji dik asak 8 ning re Shy Shasoi Hkawng Naw asak si hkrum wa nna, Kamoi yan gaw, hkala sawng ai majaw, Laiza mung shawa tsi rung de htaw mat wa ai lam, ginra masha langai KNG shiga de n dai zawn tsun dan wa ai re.
“Shan Moi ni masum re ga rai nga ai, ya si mat ai wa gaw Kashu ang ai ga rai nga ai, Hpt Lapa Dau Naw hte Shasoi Lum Ze yan a kasha kashu ni rai nga ai, Kasha Ze Nyoi hte Ze Yang gaw, Bawm hkyep hkra na hkala ai, hkala ai yan hpe gaw, Laiza de htaw mat wa na, Ya si mat ai ma hpe gaw, masa n tsawm ai majaw, Myitkyina Waimaw ni ai tsi rung de htaw sa wa ai ten, Waimaw n du lu kaw n sa hti mat ai,” nga dai ginra na Salang langai KNG shiga dap de tsun dan wa ai re.
Shasoi Lum Ze hte Madu Jan Hpt Lapa Dau Naw yan gaw, Yi galaw ai majaw, Yi de Kasha ni hpe wa jahkrum na matu htet dat na, wa jahkrum na bai yu wa ai ten, ya na zawn Si hkala hkrum wa ai mung rai nga ai.
Lai wa sai Shata kaw na Myen Hpyen dap ni KIA the pawng hpawm dap ni dap jung shara la nga ai, Waimaw Lamyang mare maga de htu shadut htim gasat wa ai majaw, Majan shani shagu byin nga ai re.
Dai zawn, Majan byin ai shara ni de Myen Hpyen dap maga na, Nbungli the shani shagu sa gap gasat lawm nga ai zawn, Myitkyina hkran maga na, Waimaw 58 dap na Laknak kaba hte shani shana gap sharu bun taw nga ai re.
Waimaw Lamyang mare makau grup yin ya ten byin nga ai majan masa lam the seng nna, ginra mash awa n dai zawn matut tsun dan wa ai re.
“Ndai laman gaw shan the wa htim ai ga rai nga ai, anhte maga na ni gaw, hkap shingla gasat ai hku na nga taw ai, shan the htim lung wa ai majaw, ndai maga na ni mung hkap shingla gasat ai re nga yang, Myen ni maga sum machyi law ai ga rai nga ai. Shawoi gaw Lamyang Mare Gam bum 3 kaw na gambum mi gaw Myen ni nga ai rai nga ai, ya n dai laman Shanglawt ni yawng sa shachyut gasat kau sai, n nga sai. Ya Myen ni gaw le wuyan de du hkra yu mat sai ga rai nga ai,” nga tsun dan ai re.
Lai wa sai bat laman Lamyang mare de htu lung wa ai Myen HPyen hpung ni hpe ning hkap shingla gasat ai hta, Myen hpyen dap maga si hkala sum machyi lam ni law nna, Myen Hpyen bawng masha n kau hpe mung lu rim la ai lam nga ai hpe chye lu ai re.