India Mungdan Hkringmang Daju Modi hte Gumshem Myen hpyendap ningbaw Min Aung Hlaing yan gaw mani August 31 ya shani Miwa Gumsan Mungdan, Tiyangjin muklum kaba kaw hkrum jahta wa ai re.
Dai hkrum jahta ai lam hta Myen mung na, gasau (rare-earth) hte seng nna mung bawngban wa ai lam, myen hpyendap hte ni nawn ai shiga dap ni hta mu lu ai re.
Ya yang, Myen mungdan hta gasau nhprang htu ai shara ni gaw, KIO, UWSA, NDAA dai laknak hpai hpung ni up hkang tawn ai ginra ni hta rai nga ai.
Dai majaw, Myen Hpyen dap ningbaw Min Aung Hlaing hku nna, gara hku matut galaw sa wa na lam hpe chyawm gaw, naw yu maram ra na re zawn, maga mi hta India mung hte ni dik gaw, Jinghpaw mung re majaw, Myen hpyendap gaw, KIO madu tawn sai Chipwi – Pangwa ginra ni hpe bai lu zing hkra, hkyen sa wa na masa nga taw ai lam jinghpaw mung mung masa yu maram ai ni tsun tawn ai re.
YaMyen, Miwa, India, ni Gasau lam the seng na jahta wa sai re majaw gaw, Gasau pru ai ginra de majan laja na gaw matut byin wa sana re lam, Mung masa yu maram taw ai, Salang langai KNG shiga de n dai zawn tsun dan wa ai re.
“Ameracan wa Ga sau hpe Myit shang sha ai lam tsun pru wa ai hte rau, Myen the India hkrum jahta wa ai hpe yu yang, Jinghpaw mung kaw pru ai Ga sau hpe India wa mung myit shang sha wa ai ga rai nga ai, Ga Sau pru ai gaw, Jinghpaw mung kaw she bai re rai nga yang gaw, Ya Ga sau pru ai Chihpwi Pang Wa ginra de gaw, Majan laja wa na gaw, ga lahtum n shut rai nga ai, du wa na September- October hkan na gaw, Waimaw Kanpaiti Chihpwi , Pang Wa ginra yawng de Majan grai laja wa na ra ai,” nga tsun maram tawn ai re.
Min Aung Hlang wa gaw, Miwa Gumsan magam saw shaga ai The Shanghai Coorperation Organization (SCO Summit) hpawng lamang hta sa du shang lawm wa ai ten, India Mung Gumsan magam wa hte hkrum jahta byin wa ai lam rai nga ai, ndai miwa mung na Zuphpawng kaba hta gaw Mungdan shagu na gumsan magam, Hkringmang daju ni sa du shang lawm taw ai Hpawng kaba lamang re lam chye lu ai.
Miwa Asuya maga, Japan Ninghkap Majan Dang (80) Ning hpring lamang hte The Shanghai Coorperation Organization (SCO Summit) hpawng kaba lamang lahkawng hpe August 25 kaw na, du na September praw 5 ya shani du hkra galaw sa mat wa na re majaw, Jarit mayan ni hta majan n shabyin ya na matu, KIO Ginjaw de tsun shana da ai lam mung nga ai hpe sagawn chye lu ai re.
Ameracan Asuya maga, Myen Mung Ga sau masa lam hte seng na myit shang sha ai lam lai wa sai July praw hta, Myen Mung Ga Sau masa lam the seng na madat hkam la ai hpawng lamang langai galaw wa ai hpe chye lu ai.