Manmaw Majan hta KIA hte Pawng hpawm dap ni htim gasat da ai dap shara de htu shadut htim gasat shang wa ai Hpyen hpyen hpung ni hpe hkap shingla gasat ai hta, Myen Hpyen dap maga si hkala law wa ai the, Hpyen Hpung nawng hpe gap shatsai kau lu wa ai nga, shawng lam hpyen magam gun ni KNG shiga dap de tsun dan wa ai re.
Lai wa sai bat August 23 ya shani kaw na, KIA gasat zing da ai, Hprigang dap ၅၀၁၄ hte ခလရ ၂၃၆ dap maga ni de Myen ni hpyen n gun kaba the htu gasat wa ai hpe, Pawng hpawm dap maga hkap shingla gasat ai hta, Myen HPyen dap maga Si hkala law wa ai re nga, shawng lam hpyen magam gun langai KNG shiga de n dai zawn tsun dan wa ai re.
“5014 Hprigang dap maga de na htu gale pru wa ai hpe Pawng Hpawm Dap maga na hkap shingla gasat ai majaw Myen ni lahkawng garan mat ai, Myen ni n lu pru hkra Pawng hpawm dap maga na wang matep gasat da ai, langai pyi n ngam hkra yawng lu gasat shamyit kau ai, ngut na mani mung Hpyen hpung langai bai pru wa ai, hkap shingla gasat dat ai hta, sum machyi law wa nna, Ts.K.Hk 21 dap de bai hprawng shang mat ai,” nga tsun dan wa ai re.
Dai Hpyen HPung ni gaw, KIA htim gasat zing madu da ai ခလရ ၂၃၆ dap maga de htim gasat wa ai hpe Pawng hpawm dap maga hkap shingla gasat dat ai hta si hkala sum machyi law wa ai lam mung rai nga ai.
Dai zawn sha August 26 ya shani hta mung Hpyen hpung langai bai htim gasat pru wa ai hpe Pawng hpawm dap maga hkap shingla gasat ai hta sum machyi law ai hte bai htingnut mat wa ai lam chye lu ai.
Manmaw majan hta Myen Hpyen Hpung langai hpe lam lapran hkap shingla gasat ai hta Hpyen hpyen hpung maga mawdaw nawng mawdaw n tsa kaw si jawng taw ai sumla mung, Online n tsa pru wa ai hpe mu lu ai re.
Dai ni du hkra manmaw majan laja lana matut gap gasat hkat taw nga nna, ya gap gasat hkat nga ai sharani gaw အမတ ၃၆၆၊ ခလရ ၂၃၆ hte Hprigang dap ၅၀၁၄ shara ni hta re lam chye lu ai.
Myen Hpyen dap ni Manmaw de lai wa sai July Shata kaw hka Sanghpawli hte Hpyen n-gun laknak arung arai wa htaw sa da ai hpang, Pawng hpawm dap ni gasat zing da ai shara ni de htim gasat majan bai baw wa ai mung rai nga ai.