2024 ning Indaw Majan byin wa ai ten kaw na, Myitkyina Mandalay lam kaba hpe laknak lang rawt malan hpung lahkawng maga de na pat kau ya ai majaw, hkrun lam hkawm mawdaw ni, koi lam hku na hkrai lai ra taw nga ai ten, ya lanam ta ten kaw hkrun lam nya hten ai mayak a majaw, hkawm sa hkawm wa yak hkak taw nga ai lam Mawdaw la ni tsun ai re.
Ya lanam ta ten, ပေကြီးကွင်းလမ်း ngu chye law ai, hkum pup Ga lam deng 40 daram galu ai lam hku na hkawm sa ra taw ai majaw, Mawdaw kaji ni lai n mai yak hkak taw nga ai lam, Myitkyina Mandalay Mawdaw la langai KNG de n dai zawn tsun dan ai re.
2024 Ning Indaw Majan hpang wa ai ten kaw na, Mawdaw lam kaba hpe lahkawng maga de na ni pat kau ai hpang, ပေကြီးကွင်း lam ngu chye da law ai, ndai Kanbalu Ginwang kata na Inn Mare, Kalung Mare mayan hku na lai ra taw ai rai nga ai, Ya gaw, lanam ta ten re majaw, lam nya na lai n mai grai pat jawng taw ai, yu mung n mai, lung mung n mai grai chyat jawng taw ai nga na,” Myen ga hku na tsun dan wa ai re.
Ya ten Mandalay Yangon hte Jinghpaw mung hkrun lam matut mahkai yak mat ai majaw, Nbungli manu ni mung ladu lai tsaw rawt taw nga ai re.
Lam lapran ya na zawn lam madi manyap yak hkak taw nga ai majaw, gunrai htaw mawdaw hkying lam, lam lapran kaw chyat taw nga ai re.
Ya na zawn hkrun lam grai yak hkak taw nga ai majaw, Mung shawa ni maga na laknak lang rawt malan wuhpung lahkawng maga de, Gat dara lam kaba hpe lawan atsawm bai hpaw ya na matu ra sharawng nga ma ai re.
Ndai zawn lam pat da yang gaw, hkrun lam hkawm yak hkak ai sha n ga, gunrai manu ni mung lani hte lani tsaw rawt jat nga tik tik masa re lam chye lu ai.
Jinghpaw mung kata ndai laman hkrun lam mayak a majaw, lawu ga de na lung ai gunrai ni n nga ai daram dumhprut wa taw nga ai lam, Myitkyina mung shawa ni tsun ai re.