Manmaw majan laja lana matut gap gasat hkat taw nga ai ten Myen Hpyen Hprigang mawdaw langai hpe pawng hpawm dap maga na bai lu gap jahten kau ya ai nga, shawng lam hpyen magam gun ni tsun ai re.
August 20 ya shani Manmaw Myoma lawk Hotel makau ni hkan laja lana gap gasat hkat wa ai hta, သိမ်တော်ကြီး hpungkyi jawng shawng kaw shatsap da ai hpri gang mawdaw hpe gap jahten kau ya lu ai nga, shawng lam hpyen magam gun ni tsun ai re.
“Manmaw majan dai hpawt hkying 8 ram kaw na laja lana bai gap gasat hkat wa ai, Myen Hpyen dap maga na gaw, hpri gang mawdaw ni hte htu shadut htim gasat ai lam ni galaw wa ai ga rai nga ai, dai ni byin ai majan hta Myen hpyen dap maga tsawm ra sum machyi ma ai, sum machyi law ai majaw, dai na de hkying 2 ram kaw na bai thing nut mat ma ai. Hpri gang mawdaw hpe gaw lu gap jahten kau ya ai ga rai nga ai,” nga na tsun dan wa ai re.
Dai zawn hpyen masa lam hta ahkyak dik ai hpri gang mawdaw hpe pawng hpawm dap maga na Suicide Drone hpan hte gap jahten kau ai lam re nga, shawng lam magam gun hte ni nawn ai ni tsun ai re.
Ya lu gap jahten kau ya ai Hpri gang mawdaw gaw, Lam kaba ni de pru nna, n ta htap tsaw ai shara ni hpe hkan gap jahten taw nga ai zawn, dai hpri gang mawdaw a majaw, pawng hpawm dap maga na mung ram ram sum machyi sai re lam chye lu ai.
Ya ten Manmaw majan shara masum ram hta laja lana gap gasat taw nga ai lam chye lu ai.
Ya laja lana gap gasat hkat taw nga ai shara ni gaw, Ta Mai Lung maga Ts.K.Hk 21 dap shara the Dapnu 88 ni shara la nga ai Manmaw Dakkasu jawng hte Myoma lawk na Winlight Myint Sone Hotel shara ni hta re lam chye lu ai.
Myen Hpyen dap maga na n dai Shata hka sanghpawli du ai hpang, KIA ni nga ai shara de htu shadut htim gasat ai lam ni bai galaw wa ai majaw, majan laja lana gap gasat hkat taw nga ai mung rai nga ai.
Ya ten Myen HPyen dap ni gaw, Pang Ga Gaduk ni hta rawng nga nna sha, Pawng hpawm dap ni hpe Drone laknak kaba nbungli ni the hkrai gap gasat taw nga sai rai nna, shawng lam de htim na masha tsawm ra bai yawm taw sai nga, Manmaw hte ni nawn ai Hpyen masa yu maram ai ni tsun da ai re.
Ya ten, Myen Hpyen dap maga na gaw, Drone 4,5 ram hte shani shagu bawm 50,60 lang hkan jahkrat hkawm taw nga ai sha n ga, Nbungli hpan hkum hte mung shani shagu wa gap gasat taw nga ai re.
Manmaw hpe Wunpawng Mungdan Shanglawt Hpyen Dap KIA woi awn ai hte pawng hpawm dap ni December praw 4 ya jahpawt kaw na htim gasat hpang wa ai gaw, dai ni ten du hkra laja lana naw matut gap gasat hkat taw nga ai rai nna, dap shara n kau hpe KIA maga zing madu da lu ai lam ni mung nga sai re.