Mai Nawng mare hta, Sam Hkyeng SNA dap ni kaw nna, Mung mare masha ni hpe hpyen ninggang shatai nna Hpungkyi jawng wang kaw mahkawng rawng taw nga ai lam, ginra masha ni tsun dan wa ai re.
Sam Hkyeng SNA dap ni htim gasat zing da ai Mai Nawng mare hpe, Wunpawng Mungdan Shanglawt Hpyen Dap KIA hte PDF dap ni kaw na lai wa sai, August 16 ya shani kaw na bai htim gasat wa ai majaw, dai mare kaw nga ai, Myen Sam ni hpe pru na ahkang n jaw ai sha, Hpungkyi jawng kaw yawng hpe shaga woi bang da ai nga, Ginra masha langai KNG de n dai zawn tsun dan wa ai re.
Ndai laman majan grai bai laja wa ai majaw, dai kaw mi na nga ai myen sam ni pru mayu ai hpe npru shangun ai sha Hpungkyi jawng kaw sha yawng hpe nga shangun da ai. Hkrit na hprawng mayu tim, gara de mung n hprawng shangun, Hpyen ninggang shatai woi da ai ga rai nga ai, shan hte hkrai nga taw yang, PDF ni sa gap na tsang na mung shawa ni hpe လူသားဒိုင်း galaw ai ga rai nga ai,” nga tsun dan wa ai re.
Mai Nawng mare hpe lai wa sai July Shata kaw na Sam Hkyeng SNA dap the Pyithutsit, Myen Hpyen Dap ni pawng hpawm nna, N-gun kaba hte má ja htim gasat shang wa ai majaw, KIA PDF dap maga na gan yen kau da ya ai rai nga ai.
Mai Nawng mare hpe KIA dap maga yen kau da ya ai hpang, Jinghpaw the PDF dap ni hpe madi shadaw ai Myen Sam ni hpe, Sam HKyeng SNA dap ni ladu lai zingri ai lam ni galaw wa ai majaw, yawng hprawng yen ma ai rai nga ai.
Mare hpe SNA dap ni zing madu kau ai hpang, Shan hte hpe madi shadaw ai Myen Sam ni hpe bai shaga la nna, Jinghpaw the laga PDF hpe madi shadaw ai dum n ta ni yawng hpe zaw la zing kau ya wa ai re.
Dai zawn mare kata nga ai Myen Sam Mung Shawa ni gaw, Majan laja lana gap gasat hkat wa ai majaw, Mare kaw na hprawng yen na matu shakut taw ai rai tim, Sam HKyeng Dap ni, pru na ahkang n jaw, Hpungkyi jawng wang kaw mahkawng bang da ai lam chye lu ai.
Ya ten, dai ginra na ahkyak ai lam kaba shara ni rai nga ai, Na Mawn Bum hte Lung Tung mare ni hta Myen Hpyen dap hte Sam Hkyeng SNA dap ni lam pat da nna, gadai hpyen yen mung shawa ni hpe mung n shalai ai sha pat da ai lam chye lu ai.
Mai Nawng mare hta dai ni ten dau hkra, Sinat kaba ni the gap gasat hkat taw nga nna, Myen hpyen dap maga na Nbungli bawm ni the mung ding yang wa jahkrat bun taw nga ai lam chye lu ai re.