Myen Hpyen Dap Jet Nbungli langai hte Man Win Gyi mare kaw, mana hkying 12:46 Am aten bawm 3 lang wa jahkrat bun kau da ai lam chye lu ai.
Myen Hpyen dap nbungli bawm wa jahkrat bun ai shara gaw, Lagat daw mare hte Kawng Hkang Hpyen Dap shara kaw wa hkat ai lam chye lu ai.
Dai shara gaw, moi ten kaw na, Lung Pu ni the hkrak kring mading rai gaw gap da ai dap shara re majaw, Mana Nbungli bawm wa jahkrat ai ten hta rai tim, Mung Shawa magam gun Si hkala ai lam ni hpa n nga ai nga Ginra masha langai KNG shiga dap de n dai zawn tsun dan ai re.
“Hpyen Dap hte mung Shawa ni nga ai shara grai tsan ai, No.1 wa jahkrat ai shara gaw, Lagat Daw nga mare kaw wa hkrat ai majaw, shalawng kaw wa hkrat kapaw ai majaw, shalawng yawng wan hkru mat nna, No.2 hte 3 wa jahkrat ai gaw, Kawng Hkang Hpyen Dap kaw wa hkrat ang ai rai nna, dai Hpyen dap shara kaw moi myen ni naw nga ai ten kaw na, kring mading lung pu kaduk nga da ai re majaw, yawng dai de aten dep lu shang mat ai majaw, mung shawa si hkala ai lam gaw hpa n nga ai,” nga nna, Ginra amyu shayi langai KNG shiga dap de tsun dan wa ai re.
Mana Nbungli bawm wa jahkrat ai shara gaw, Wunpawng Mungdan Shanglawt Hpyen Dap KIA masat 11 Dapba ginra rai nna, dai shara hta Myen Hpyen dap ni kring mading gaw gap kau da ai Lungpu gaduk ni hte rai gaw gap da ai ai Hpyen dap shara re hpe chye lu ai.
Mana Nbungli bawm wa jahkrat ai hta, Pound 250 daram kaba ai Nbungli bawm 3 wa jahkrat bun ai hta, 2 gaw kapaw nna, ngam ai langai gaw, rai n kapaw shi ai lam chye lu ai.
Ya ten Manmaw majan laja lana gap gasat hkat taw nga ai ten, dai ginra ni hta majan byin ai lam hpa n nga ai rai tim, ya na zawn nbungli bawm wa jahkrat bun wa ai lam mung rai nga ai.
Mana hkying 8 aten daram hta sha, Balawng TNLA dap ni zing da ai Mogok mare kaba hta mung Nbugli bawm wa jahkrat bun ai majaw, Ma Shangai taw nga ai dum n ta hta mung shawa marai 21 asak si hkrum wa nna, marai 3 hkala sawng hkrum wa ai lam matut chye lu ai.