Indawgyi lam maga hku, Hpakant de lung ai gunrai htaw mawdaw ni hpe Lung Tung SNA Shagyit kaw n shalai ai majaw, Mawdaw Tsa lam pat hkrum taw nga ai re.
Indawgyi – Gwi Hka lam lapran Lung Tung Sam Hkyeng SNA Shagyit hta gunrai htaw mawdaw ni hpe n shalai ai majaw, dai lam kaba n tsa kaw mawdaw 100 jan pat hkrum taw nga ai lam Mawdaw la langai KNG Shiga dap de tsun dan wa ai re.
“ Lai wa sai bat hta gaw, Mawdaw 10 hpe kalang shalai, Mawdaw 5 dang hpe kalang shalai rai, sup hte sup shalai ai rai nga ai, ya ndai laman gaw, tsep kawp nan bai n shalai taw nga ai, Hpakant na yu wag aw mai ai, Lung wa n mai taw nga ai. Moi ya gaw, Na Mawn Bum kaw pat ai. Ya bai rai yang gaw, Lung Tung kaw bai pat da taw nga ai,” nga nna tsun dan wa ai re.
Lai wa sai July 15 ya shani Myen HPyen dap the SNA dap ni Mai Nawng Mamung Kai mare ni hpe htim gasat zing madu kau ngut ai hpang, Dai lam kaba n tsa hkrun lam hkawm mung shawa ni hpe Sam Hkyeng SNA dap ni ladu lai san jep ai lam galaw nga ai re.
Lai was ai ten hta gaw, Na Mawn Bum hta pat ai rai tim, n dai laman gaw, Lung Tung kaw bai pat da hkrum ai mung rai nga ai.
Ya ten Dai lam kaba hta Hpakant na Yu wa gaw mai ai rai tim, Lung wa n mai taw ai nga hkrun lam hkawm mung shawa ni tsun ai re.
Lai wa sai August praw 4 ya jahpawt hta mung Hpakant kaw na yu wa ai Jinghpaw marai lahkawng hpe Sam Hkyeng SNA dap ni Ma Mung Kai Shagyit kaw kanoi sin a ram adup gayet zingri wa ai lam chye lu ai.
Ya ten Sam Hkyeng SNA ni gaw Jinghpaw Shamyit masing hku na majan baw taw nga ai majaw, Indawgyi Gwi Hka lam hta Jinghpaw re ai ni gadai n hkawm sa shi na matu ginra masha ni tsun sadi jaw tawn ai re.