Wara Zup Pyithutsit Min Zay hpung ni KIA Dung 20 ginra hpe htim gasat zing madu ai hta, Dai majan kaw lu rim woi la ai Shanglawt Du ni kaw na, ahkyak ai KIA a ahkyak ai lam ni yawng hpe san jep la nna, n dai laman Jahtuzup hte Nawngmi mare lapran hkrun lam hkawm mung mare masha ni hte ginra masha ni hpe ladu lai san jep ai lam galaw nga ai nga, ginra masha ni tsun ai re.
July 12 ya jahpawt,Hkum Tsai Yang mare baw Lup Wa Kawng hpe Pyithutsit the Myen Hpyen dap ni bai n htang htim gasat ai hta lu rim woi la ai KIA Dujum Lagang Hpan Tang hpe Adup gayet zingri nna, dai ginra na KIA dap ni a shamu shamawt lam, Hpyen masa lam ni yawng jep san la nna, Shi Phone kaw lawm ai masha ni hpe sumla hte hkrak san jep ai lam ni galaw taw nga ai lam ginra masha langai KNG shiga dap de tsun dan wa ai re.
“ Ya hte Dung 20 hpe htim gasat zing ai shaloi Shanglawt Du n kau hpe Pyithutsit ni jahkrung lu rim woi la ma ai, dai ni kaw na Shanglawt Hpyen dap a shamu shamawt Masa lam ni yawng jep la ma ai da. Dai Du ni na Phone kaw rawng ai masha, Phone No. ni the hkrak hkrak rai na jep taw nga ma ai da. Shawoi gaw Mare masha ni hpe gaw n jep ai rai nga ai, ya gaw mare masha ni hpe mada mu mamu yawng hpe akrit akrai jep ma ai,” nga nna tsun dan ai re.
Wara Zup Pyithutsit hpung ni gaw, KIA Dung 20 na Dujum Lagang Hpan Tang hpe jahkrung rim woi la nna, lam amyu myu hku zingri san jep la ngut ai hpang, adup gayet sat kau ya ai lam chye lu ai.
Lai wa sai April Shata Myen Hpyen dap ni Hpakant de kalang bai htu lung wa ai ten, Wara Zup Pyithutsit hpyen hpung ni hte KIA Dung 20 na ni Lawa mare makau grup yin ni hta laja lana gap gasat hkat wa ai re.