Laiza Makau grup yin ni hta Dai hpawt manap jau hkying 1 aten daram kaw na Marang htu kaba nna, Munglai Hka tung kaba wa ai majaw, Je Yang, Hpum Lum Yang, Jahtu Kawng mare ni hkan na mung shawa dum n ta hte Hpyen Yen dum n ta ni yawng hten ma ai lam chye lu ai.
Ndai laman Jarit mayan de Marang htu kaba taw nga ai n htoi 3 ya ram du wa ai hpang, dai hpawt manap Myi mu wa ai ten kaw na Munglai Hka Mawru ru hkrat wa ai majaw, Hpyen Yen mung shawa dum n ta law law hten za hkrum wa ai lam, Hpyen yen amyu shayi langai KNG Shiga dap de n dai zawn tsun dan wa ai re.
“Jeyang Hpyenyen Dabang gaw, Lawk 9 mare ka-ang hku lwi mat ai, ngut na Miwa jawng ni gaw chyen mi yawng mat ai, KBC Hpungrung hte Shat Gawk ma yawng mat ai, Lawk (1) Hpri lawk maga chyen mi yawng mat ai, Hka kau hte ni ai nig aw maja nga ding yang re. dai hpawt jau na akajawng byin wa ai majaw gaw, arung arai ni hpa mung n lu la kau dat ai ga rai nga ai, yawng hka kaw yawng lawm mat sai,” nga tsun dan ai re.
Jahtu kawng mare hta mung Munglai hka mawru ru hkrat wa ai majaw, dum nta 44 hka the yawng kaput hten ma nna, ya ten, Nawku jawng wang hta wa hprawng machyu jawng taw ai lam matut chye lu ai.
Dai hpawt na Hka mawru kaba hta sawng dik gaw Jahtu Kawng mare rai nna, Jahtu kawng mare na dum n ta law malawng hka wa kaput kau ma ya ai lam chye lu ai.
“Anhte Jahtu Kawng ni gaw, htinggaw 44 re, hka yawng wa kaput galup kau ma ya sai majaw, rawng n mai mat na, ya KBC Nawku jawng hte Kahtawlik Nawku jawng ni hta wa hprawng yen nga ga ai,”
Jahtu Kawng mare na amyu shayi langai matut tsun dan wa ai re.
Dai hpawt manap Hka kaba wa ai majaw, Lam ni yawng gyi kaput ru ma nna, hkrun lam matut mahkai mung n mai yak hkak taw nga ai lam chye lu ai.
Ya ten Munglai Hka Mahkrai lim mat ai majaw, Laiza hte Mung Seng Yang mare lapran pyi hkawm sa n mai taw ai lam, ginra masha ni tsun ai re.