Jinghpaw mung Dingdung jahtum na mare kaba rai nga ai, Naw Mung Ginwang kata na Htalaa Htu mare na Hka Hpyen tsin yam hkrum ai mung mare masha ni yawng, ya ten Naw Mung Nawku jawng wang ni hta wa machyu shingbyi taw nga ai rai nna, malu masha garum ningtum lam ni ra ahkyak taw nga ai lam chye lu ai.
N ta htinggaw 14 nga ai Htala htu mare gaw lai wa sai June Shata shawng na bat hta marang kaba htu hka tung kaba wa nna, mare kata na mung shawa dum n ta 10 jan hka kaba ai kaw yawng lawm mat ai rai nga ai.
Dai hka kaba wa ai ten, mare ting na lu ai arung arai ni yawng hka de yawng lawm mat ai majaw, ginra masha ni lu na, sha na yak hkak mat ai mung rai nga ai.
“Hka Hpyen hkrum ai Htala Htu mare ting na Mung mare masha ni Naw Mung de htawt sit yu wa na matu hkyen taw sai, ya htinggaw 5 ram gaw du yu wa sai. Ya Yawm yawm gaw, lahkawng ning ram gaw machyu ra na rai nga ai,Ya hprawng yen yu wa ai hta, asak kaba sai ni law malawng re majaw, tsi mawan hte malu masha garum ningtum ra taw ai ga rai nga ai.” Nga Naw Mung Ginra na amyu shayi langai KNG shiga dap de tsun ai re.
Htala htu mare ting hka lim mat sai majaw, mare nnan bai de la na matu n loi mat sai majaw, dai mare na mung shawa ni yawng Naw Mung kaw sa machyu let ra ai lam ni hpe gau ngwi ngwi bai gaw sharawt la mat wa ra na re lam matut chye lu ai.
Htala htu mare Hka hpyen hkrum ai ni hpe garum sa wa na matu Putao ramma ni the Rawang ramma Htunghking hpung ni kaw na mung alu tam lamang amyu myu galaw nna, ra ahkyak garum ningtum lam ni hpe jaw ya taw ai hpe matut chye lu ai.
Htala htu mare gaw, Putao Naw Mung mare kaw na Sengke hte n htoi 4 ya naw sa ra ai shara rai nna, Nmai hka kau kaw nga ai mare re lam chye lu ai.
June Shata praw Nmai hka kaba wa ai majaw, Htala htu mare masha ni a, Mam, malu masha the laga dinghku arung arai ni yawng hka kaw yawm lawm mat ai majaw, ya ten, dai mare masha ni hkum kaman hte sha nga taw ai lam chye lu ai re.