Shwegu kaw na Manmaw maga de lai lung wa na hkyen ai Myen Hpyen Hka Sanghpawli masum hpe July 27 ya shani KIA hte PDF dap ni Hka lam gyip ai shara kaw hkap gap gasat dat ai majaw Shwegu de bai n htang gayin yu mat ai lam chye lu ai.
July 17 ya shani kaw nna, Mandalay kaw na Hpung lahkawng garan nna, lung wa ai MyenH Pyen Hka Sanghpawli 20 jan kaw na, Sanghpawli 12 gaw lai wa sai bat 6 ya shani July 26 ya shana Shwegu kaw wa du shatup nga sai lam chye lu ai re.
Dai 12 kaw na Sanghpawli 3 gaw, July 27 ya shani shawng lam masam maram ai hku na lai lung wa ai hpe KIA PDF dap maga Sin Hkan n pu Mali Hka lam gyip ai shara kaw hkap shingla gasat dat ai rai nga ai.
Dai Hka Sanghpawli 3 hta Hpyen n-gun 100 daram lawm ai rai nna, Dai Sanghpaw n tsa hta madang tsaw laknak kaba ni hte rai na lung wa ai rai nga ai.
Dai hka Sanghpawli 3 hpe Shwegu ginwang Ngabat Wa mare makau hkap shingla gasat dat ai hta Sanghpaw kaji langai hkra hten ai lam, PDF lit nga ai ni tsun shateng ai re.
“ Ngabat Wa mare kaw majan byin ai, byin yang shan hte gaw Sanghpaw n tsa kaw na gap garum ai zawn rai nna, Sanghpaw 3 pru wa ai. Dai hku rai na aten gadun majan byin wa ai. Ya anhte maga na mung Manmaw de n lai lung wa hkra gaw hkap shingla gasat nga ai,” nga Shwegu PDF na lit nga ai magam gun langai KNG de tsun dan wa ai re.
July 26 ya shani hta mung Katha Ginwang Moe Thar Lay the Shwegu lapran kaw hkap shingla gasat ai hta mung Myen hpyen dap maga si hkala lam ni law wa ai lam matut chye lu ai re.
Ya ten Shwegu kaw du nga ai Myen hpyen hka sanghpawli 12 gaw, gara de mung n shamu lung wa ai sha, Shwegu Sanghpaw daru kaw hkring nga ai n htoi 4 ya rai sai lam chye lu ai.
Shwegu Sanghpaw daru kaw Myen hpyen hka Sanghpawli jahkring da ai majaw, Mung mare masha ni hpe Hka lam hku hkawm sa ai lam yawng hpe pat da nna, makau grup yin hkan Myen hpyen n gun law dik jahkrat da ai lam chye lu ai.
Myen Hpyen Hka Sanghpawli lung wa ai lam ding yang mare ni de laknak kaba gap shadam bun, nbungli hte gap gasat re lam ni a majaw, Mung shawa marai 20 jan si hkrum nna, marai 100 hkawt daram hkala hkrum sai re.