Myen hpyen dap Lawa mare Lahta tsang Hpaji jawng hta nbungli bawm lahkawng wa jahkrat bun ai majaw dumsu 9 si nna, hpaji jawng ni yawng hten hkrum wa ai nga, ginra masha ni tsun dan wa ai re.
April praw 2 ya shana maga hkying 4 daram aten hta Lawa hpaji jawng kaw nbungli bawm wa jahkrat bun ai hta Lawa hpaji jawng gawdin pa kaw wa hkrat ang ai majaw, dumsu 9 si nna, laika sharin jawng gawk n kau hten za hkrum wa ai rai tim, dai shara hta gadai n nga ai majaw masha gaw, si hkala ai lam hpa n nga ai nga na tsun dan wa ai re.
“Mana hkying 4 ram hta Lawa jawng kaw nbungli bawm lahkawng wa jahkrat bun da ma ai, Lawa jawng gawdin pa kaw wa hkrat ai, dumsu nga 9 si ai, jawng ni hten ma ai, masha gaw hpa n ra ai, ngut na mana hkying 7 kaw na dai hpawt du hkra grai bai gap hkat taw nga ai,” nga tsun dan wa ai re.
Myen hpyen dap nbungli bawm wa jahkrat ngut ai hpang, Myen hpyen dap hte Pyithutsit ni Lawa mare maga de Dumbang hte Kamaing lam ni hku na bai htu shadut gasat wa ai majaw, Hkum Tsai Yang hte Dumbang lapran dai hpawt du hkra majan byin wa ai lam matut chye lu ai.
Ya ten Lawa mare makau grup yin hta hpyen masa matut shaja hkat taw nga ai majaw, Lawa ninghtawn kata na Hkum Tsai Yang mare hte Magawng Tawng mare na mung shawa n kau pat hkrum taw nga ai re.
Ya ten dai mung mare masha ni nam de hprawng yen taw nga ai majaw, dai hpyen yen mung shawa ni hpe shim lum ai shara de lu shaw woi la na matu garum ningtum ran ga ai lam dai ginra na lit nga ai magam gun langai KNG de n dai zawn matut tsun dan wa ai re.
“Ya hkyak hkyak gaw, Lawa Ninghtawn kaw lawm ai Hkum Tsai Yang mare hte Magaung Tawng mare na mung mare masha ni chyat rawng taw nga ai, nam de makoi rawng taw ai majaw, malu masha tsi mawan ni mung yak rai taw nga ai, dai ni hpe shim lum ai Myo mare de woi la ra taw nga ai,” lam matut tsun ai re.
Lawa mare hta wa du dap jung nga ai, Pyithutsit hte Myen hpyen hpung ni hpe March 31 ya shani KIA htim gasat jahprawng kau ai hpang, dai mare makau grup yin ni hta hpyen masa matut shaja hkat taw nga ai mung rai nga ai.
Dai zawn hpyen masa shaja hkat taw nga ai lapran Mana kaw na Hkum Tsai Yang mare makau grup yin bai gap gasat hkat wa ai gaw, dai hpawt du hkra gap gasat hkat wa ai re.
Myen hpyen dap ni Lido lam kaba n tsa Maran kahtawng, Dum Bung rai n du shi yang na lam hpung gaw hte Dumbang mare ni hta shagyit jahkrat na lai sa lai wa ni hpe san jep taw nga ai re.
“Dai ni shani ka-ang gaw Dum Bung rai n du shi ai lam hpung gaw kaw sengke ni hpe san jep nga ma ai, Sengke ni hpe gaw, Phone ni hpaw jep, rai ni mung yawng kasawk amya rai na san jep taw nga ai, Mawdaw ni hpe gaw gara de sa na rai nga sha san na shalai dat ma ai nga,” Myitkyina kaw na Danai maga de lung wa ai hkrun lam hkawm mung shawa langai KNG de tsun dan ai re.
Ya ten, ndai Lido lam kaba mayan de hpyen shamu shamawt nga ai Myen hpyen hpung ni gaw, Mogaung Ts.K.Hk (3), Jahtu Zup Hk. L. Y (297) hte, Dumbang Hk.L.Y(298) hte Min Zay Thant Pyithutsit, Shwe Min Pyithutsit hpyen hpung ni re lam sagawn chye lu ai.
Dai Myen hpyen hpung ni gaw, lai wa sai March Shata 21 ya shani Lawa de htu shadut shang wa ai hpyen hpung ni rai nna, Lawa mare hpaji jawng hta bat mi jan dap jung shara jahkrat nga ai hpe, March 31 ya shani yawng hpe bai lu gasat shachyut kau lu sai rai nna, ya ten dai makau grup yin ni hta KIA dap maga bai shara la da lu sai nga ginra masha ni tsun ai re.