Putao mare kaba dap jung shara jahkrat nga ai Myen hpyen dap kata hta n dai laman hpyen n’gun jat ai lam, dap shara shagreng ai lam ni ding yang galaw taw nga ai nga nna, Putao ginra masha ni tsun ai re.
Putao Sinpraw maga Htawadam mare na Myen hpyen dap de hpyen n’gun kaba ding yang jat taw nga nna, myo mare kaba ni hta mung shim lam a matu gaduk n hkun ni htu rai na, hpyen masa a matu hkyen shajin taw nga ai lam, Dai ginra na mung shawa langai KNG de tsun dan wa ai re.
“Asan sha tsun ga nga yang, Gwi pyi n mai shang hkra yawng kum kau sai, hpyendap grup hkra hpri ju hte htap lahkawng kum kau sai, ngut na mung htap hte htap gaduk ni htu shagreng da ma ai, hpyen dap grup hkra gaduk ni htu da ma ai.” nga tsun ai re.
Hpyen dap kum shagreng nga ai hte rau, hpyen n’gun ni mung ding yang na jat taw nga ai re.
Putao Myen hpyen dap daju Hk.L.Y 46 dap n pu na Htawadam mare na Myen hpyen dap gaw, dap jau dap dung kata hta, shawoi hpyen n’gun 50 ram sha nga ai rai tim n dai laman hpyen n gun 100 jan bai wa htaw sa bang da sai lam chye lu ai.
Dai mare na Myen hpyen dap gaw mare num shang hta dung da ai dap shara rai nna, mung shawa ni hkawm sa hkawm wa lam ni hpe ding yang san jep ai lam ni galaw ai dap shara re nga ginra masha langai ndai zawn matut tsun ai re.
“Lai wa sai ten gaw mare masha ni mung dap kata de rai dut nna pru shang mai ai, ya gaw tsep kawp n shang shangun mat sai, shata mi ram rai sai, ngut na mung hpyen dap shawng kaw lai sa lai wa ni hpe ding yang san jep ai lam ni galaw ai, shan hte dai hku re majaw, mare masha ni a matu gaw nshim mat ai le,” nga tsun ai re.
Wunpawng Mungdan Shanglawt Hpyendap KIA hte Rawang amyusha baw sang law malawng hte hpaw shabawn da ai KPF dap ni Putao ginra hta hpyen shamu shamawt ai lam ni ding yang galaw wa ai majaw, Myen hpyen dap maga na mung lani hte lani grau grau na dap shara shagreng ai lam ni galaw wa ai nga ginra masha ni tsun maram nga ai re.
Manmaw majan ngut ai hpang, Putao ginra de muklum shagrawt majan bai byin wa na kun ngu ai lam a n tsa ginra masha ni maja let sha nga taw ai lam dai ginra na mung shawa ni tsun ai re.