Hpakant Sabaw mare, Sabaw hka hku အဓိပတိ hkum pup nawng gyi ru wa ai majaw, mung shawa, dum n’ta 70 daram kaput lup mat nna, mung shawa marai 15 hpe shaw da lu sai lam, Dukaba Naw Bu tsun ai re.
Daihpawt January 13 ya manap jau hkying 1 chyen ten daram hta hkum pup nawng gyi ru wa ai majaw, Sabaw mare na dum nta 70 daram hkum pup lup mat nna, mung shawa marai si hkrum ai lam the seng na marai 15 hpe shaw da lu sai lam Dukaba Nhpang Naw Bu KNG de tsun ai re.
“Anhte de tang wa ai gaw, nta 70 ram lup mat ai nga tsun ai, ngut na ya du hkra rai yang marai 15 hpe lu shaw da sai, gade lup si mat ai hpe chyawm a tsawm tup hkrak n chye shi ai,” nga tsun dan wa ai re.
Dai na hkying 6 ram du hkra rai yang marai 15 shaw da lu ai hta masha kaba law malawng rai nna, ma kaji ni mung lawm ai re lam chye lu ai.
Hkum pup nawng gyi ru wa ai hta hkala hkrum ai ni mung lawm ai rai nna, dai hkala hkrum ai ni hpe mung shawa tsi rung de htaw sa da ai lam nga ai hpe chye lu ai.
Ya ten Wunpawng Mungdan Shanglawt Asuya kaw na woi awn ai hte hkye mawoi shaw ai magam bungli ni hpe galaw taw ai lam chye lu ai.
“Ya gyi ru ai hkum pup nawng hpe makau kaw na Back Hold hte gau ngwi ngwi shaw taw ai rai nga ai, dai hkum pup nawng gaw gyi ru na masa nga taw ai majaw, n galaw ging sai rai nga ai, dai hpe matut shaw taw ai majaw, n pu kaw na malawng gyi ru mat ai rai nga ai, dai hka n rawng na chyawm naw tsamai ai, lama na lanam ta hka she rawng yang gaw mare ting yawng lim mat na rai nga ai, ya hkum pup sha rai na chyawm tsamai ai,” nga dai ginra na amyu shayi langai KNG de matut tsun dan wa ai re.
Dai hkumpup nawng gaw lai wa sai 2023 ning December shata ram kaw na myit tsang ra na madang byin taw sai nawng kaba langai rai nga ai.
Dai zawn tsang ra taw sai nawng kaba hta, ahkaw ahkang lu ai ni hte Company ni kaw na ga shingbut matut ru bang ai majaw ya na zawn gyi ru wa ai re lam ginra masha ni tsun da ai re.
Hpakant lung Seng htu ai lam hta, lit nga ai asuya ni kaw na a tsawm n lu gawn hkang ai majaw, hkum pup nawng gyi ru ai lam, ga shingbut မြေစာ bum gyi ru ai lam ni a majaw mung shawa asak law law si hkrum ai lam ni byin hkrum taw nga ai re.