Man Je ginra yawng hpe Wunpawng mungdan Shanglawt Hpyendap KIA hte pawng hpawm dap maga na dai hpawt manap hkying 10 chyen ten daram hta yawng zep zi htim gasat zing madu la ngut sai nga, shawng lam hpyen shi sawk ni KNG shiga dap de tsun wa ai re.
Manje the Manmaw mare kaba hpe lai wa sai December praw 4 ya shani kaw na htim gasat hpang wa ai gaw, January praw 6 ya jahpawt kaw na n gun kaba hte numdaw kalang bai shakut htim gasat wa ai gaw, dai hpawt January 8 ya jahpawt hkying 10 chyen ten daram hta Man Je ginra yawng hpe padang dip zing la lu sai nga, shawng lam hpyen shi sawk ni KNG shiga dap de tsun shateng wa ai re.
“Manje hpe zing madu lu ai teng sai, dai hpawt hkying 10 chyen ram hta yawng ngut sai, dap masum hte hpe jasan la ngut sai, ya gaw hkum kaman hprawng hkawm nga ai Myen hpyen ni hpe matut jasan taw nga ai,” nga shawng lam magam gun hte ni nawn ai Salang langai KNG de tsun dan wa ai re.
Manje mare hta dap jung tawn ai Myen hpyendap Hk.M.Y 601, Hk.M.Y 319, Hk.M.Y 352 dap shara yawng hpe jasan la lu sai lam chye lu ai.
Manje ginra zing madu ai masa lam the seng nna, KIA Shiga magam dap lithkam Dukaba Nhpang Naw Bu hpe dai hpawt hkying 11 ten daram hta KNG kaw na Phone set san yu yang, ”lu zing madu ai lam the seng na line n tsa hkan gaw mu ai, rai tim anhte maga de tara shang tsun shana wa ai lam rai n nga shi ai” nga tsun ai re.
Manmaw hte Manje ginra hpe htim gasat ai hta, ndai shaning ningnan hpang kaw na, numdaw kalang n’gun dat na bai htim gasat ai hta, shani shagu ngu na majan laja lana htim gasat wa ai hta, Myen hpyen dap maga na mung nbungli the shani shagu wa gap sharu bun wa ai re.