Myitkyina kaw na Putao de lung ai gunrai htaw mawdaw ni Myitkyina kaw na pru wa ai Myen hpyendap shagyit ni hta Sen kahtap jaw nna, lai ra taw ai nga, Putao gunrai htaw mawdaw la ni tsun ai re.
Myitkyina kaw na Putao Sumprabum ni de gunrai htaw shalai nga ai mawdaw la ni gaw ya na zawn Myen hpyen dap hpe gumhpraw law law jaw na lai ra taw ai majaw, Putao de gunrai manu yawm ai lam n nga shawoi na zawn sha manu matut tsaw taw nga ai lam tsun ai re.
“Myitkyina kaw na pru wa ai hte Manhkring Lut Daw shawng na Myen gate kaw jaw ra sai, dai kaw na jaw mat ai Tang Hpre Myen hpyen dap gate du hkra re, gate langai hta Sen 2, Sen 2 chyen Sen 3 jaw ra ai, dai lapran hta gate yawng pawng 7 ram nga ai,” nga tsun ai re.
Manhkring Rapdaw rung shawng kaw na Tanghpre mare du hkra jaw ra ai gumhpraw yawng Sen 12 ram nga ai lam chye lu ai.
Myen hpyen dap shagyit ni hta ya na zawn manu jahpu law law jaw na lai ra taw ai majaw, Putao ginra gunrai manu yawm ai lam n nga ai sha, shawoi lam pat ai ten na zawn sha manu ni matut tsaw rawt taw nga ai re.
Dai lam lapran hta lai wa sai 2024 ning October shata du hkra shagyit langai lahkawng sha nga ai rai tim, n dai hpang daw hta, masum ram bai jat wa ai nga mawdaw la ni tsun ai re.
“Dai gate ni hta madung chyawm gaw Sau N-gu htaw ai mawdaw ni hpe madung hta ai, rai tim, laga mawdaw kaji ni mung gaw jaw ra ai. rai tim mung gate ni grau law jat wa ai majaw, mawdaw la ni na matu mayak nga ai,” nga nna Putao Mawdaw la ni matut tsun dan wa ai re.
Putao hta ya ten N-gu buri mi Sen mi mun manga kaw na Sen mi mun matsat lapran nga nna, Dat Si Liter mi hta mun mi hkying manga nga ai lam Putao ginra masha langai matut tsun dan ai re.