Myen hpyen dap daru magam zing ai ten rim sharen da hkrum ai Jinghpaw mung hkringmang daju Dr Hkyet Awng hpe Myen mung shanglawt lu ai nhtoi January praw 4 ya shani hta shalawt dat ya ai re.
Jinghpaw mung hkringmang daju Dr Hkyet Awng hpe mayun kumhpa sha ai amu manghkang taru kanu gabaw 4 hte htawng dam 12 ning jahkrat da ai kaw na, January praw 4 Myen mung shanglawt lu ai nhtoi shani hta shalawt dat ya ai lam mung rai nga ai.
Myen mung shanglawt lu ai 77 ning hpring nhtoi lamang hku nna, Myen mungdan ting na bawng masha marai 5864 hpe shalawt dat ya ai hta, Jinghpaw mung Myitkyina htawng kaba na marai 53 hpe shalawt ya ai hta Dr Hkyet Awng mung lawm pru wa ai re.
Dr Hkyet Awng Jinghpaw mung hkringmang daju galaw taw nga ai ten, Mungdan gumhpraw ni hpe n gawn nsawn jai kau ai ngu mara hte htawng dam 12 ning jahkrat da hkrum ai re.
Dr Hkyet Awng hpe jewat da ai tara kanu ni hta, Jinghpaw mung Asuya manam nta gaw gap ai hta, gumhpraw n gawn n sawn jai lang ai ngu mara hte htawng dam masum ning, 2020 ning laman Chihpwi hte Kang Fang ginra ni hta rim da ai n hprang rai ni hpe manu jahpu yawm yawm hte sha bai dut kau ya majaw mungdan asuya gumhpraw Wan 200 jan sum machyi mat ai ngu tara hte htawng dam masum ning, 2017 -18 ning laman Myitkyina Manmaw Gat dara lam kaba galaw ai hta Power Five Star Company ni hpe gumhpraw law law the galaw shangun ai ngu ai mara ni jewat nna rim sharen da hkrum wa ai rai nga ai.
Myen hpyen dap daru magam ahkang aya zing kau ai ten, Jinghpaw mung Asuya hkringmang daju hte hkringmang yawng hpe rim zing kau ai kaw na, ya ten law malawng yawng ngu na hpe bai dat ya sai rai tim စီမံဘဏ္ဍာ ဝန်ကြီး ဦးဝေလင်း hpe naw sharen da ai re.
ဦးဝေလင်း hte hkringmang daju hpe jewat da ai amu manghkang ni yawng bung ai rai nna, lahkawng yan hpe htawng dam 12 ning hpra jahkrat da ai mung rai nga ai.
Manmaw de majan laja lana gap gasat hkat taw nga ai ten, Myen hpyen dap maga na ya na zawn Waimaw ginra de kalang bai hpyen shamu shamawt htim gasat wa ai lam mung rai nga ai.