KIO ginjaw Salang ni hte Miwa madang tsaw datkasa Salang wa hte hkrum jahta ngut ai hpang, Jarit chyinghka ni yawng bai hpaw sai lam Dukaba Naw Bu KNG de tsun shateng wa ai re.
Miwa Salang hte hkrum jahta ngut ai hpang, jarit chyinghka hpaw na lam myit hkrum lam lu wa ai rai tim galoi kaw na gara hku na tara shang hpaw sa wa na ngu ai hpe tup hkrak n chye lu ai nga matut tsun ai re.
“Yawng hkra bai hpaw sai nga gaw n na ai, Mai Ja Yang, Laiza mare ni hta chyawm gate hpaw gaw hpaw nga ma ai, rai tim masha hte gunrai lai ai lam gaw grai n mu shi ai, mawdaw pru shang re ai lam ni mung n mu ai, laga gunrai htaw shalai ai zawn re lam ni gaw hpa ahkang mung rai n jaw shi ma ai, dai gate shawng kaw jahkrat da ai hpri chyinghka ni hpe hpai htawt sit kau ai daram sha re.” nga Dukaba Nhpang Naw Bu KNG shiga de tsun dan ai re.
Ndai kalang na zuphpawng ngut ai hpang, jarit chyinghka yawng bai hpaw na matu myit hkrum lam lu wa ai rai tim, masha hte jak sau shalai na lam hte seng nna, Myen hpyen dap hte naw matut bawng ban ra ai nga Miwa maga tsun ai hpe sagawn chye lu ai.
“Ya lama jarit chyinghka hpaw ai nga tim, masha hte jak sau ni gaw n mai shalai shi ai, laga masha lang gun rai ni hpe sha naw shalai shangun ai,” nga nna, KIO hte ni nawn ai salang langai KNG de matut tsun dan wa ai re.
Miwa hte hkrum jahta ngut ai hpang, Jarit chyinghka ni hpe hpaw na matu myit hkrum lam lu wa ai rai tim, Jak sau hte masha gaw tara shang pru shang ai lam rai nmai shi ai hpe chye lu ai.
dai hpawt manap Laiza Mai Ja Yang, Loi Je mare ni hta jarit chyinghka ni yawng hpe hpaw ai rai tim, masha hte gunrai htaw mawdaw ni hpe gaw tara shang pru shang shangun ai lam gaw rai n nga shi ai lam sagawn chye lu ai.
Ya na zawn jarit chyinghka yawng hpaw ai rai tim, Jak sau hte seng na n htaw shalai shangun ai majaw mung shawa ni a matu matut yak hkak na sha re nga ginra masha ni tsun maram da ai re.