Chihpwi mare kaba hpe KIA htim gasat zing madu kau ai hpang, Myen hpyen dap hte seng ai rung ni yawng hpe KIA Pat zing kau ma nna, KIO a uphkang sairu hkrang hte uphkang sa wa na matu hkyen shajin taw nga sai lam ginra masha ni kaw na chye lu ai.
Chihpwi mare na Myen hpyen dap hte Balik dap ni yawng hpe htim shagrawt ngut ai hpang, October praw 1 ya shani kaw na KIA pawng hpawm dap ni Chihpwi mare na Myen hpyen dap hte seng ai rung ni yawng hpe hkan adup pat kau nna, KIA/KIO ngu ai laika tsi hkyeng hte hkan ka shakap da ai nga ginra masha langai KNG shiga de tsun dan ai re.
“Chihpwi kaw ya gaw Sinat n’sen gaw nna sai, KIO uphkang sai ru hkrang hte sa na matu, seng ang ai Asuya rung hkan yawng tsi hkyeng shakap nna mying ni hkan ka kau ma sai. myusha dawng hkawn sharawt da ai chyawm rai n mu shi ai, mare kata yawng Shanglawt ni hkrai rai sai,” nga tsun ai re.
KIO uphkang sairu gran sa wa lu na matu, hkamja lam hte hpaji lam ni hpe shawng num shawn shaw hkrang shapraw taw nga sai re.
KIO uphkang hpung ni kaw ni Chihpwi mare mung shawa yawng hpe October praw 1 ya shani shaga hpawng la nna, KIO uphkang sairu hkrang hte seng nna, tsun sanglang dan ai lam ni galaw mat ai re hpe chye lu ai.
“`Ndai shata praw langai ya shani yawng hpe shaga nna, uphkang hkrang hte seng nna tsun jahkrup ai lam ni galaw ai. madung gaw KIO uphkang mat wa na masa hte seng nna mung shawa ni hpe tsun jahpra dan ai ga rai nga ai, tup hkrak gaw rai nrai shi ai, shada lapran kaw wang lu wang lang tsun jahta hkat ai hku na tsun jahta ai, dai hta madung muklum uphkang hkrang masa hte hpaji lam, hkam ja lam ni hpe tsun bawngban mat ai,”nga tsun dan wa ai re.
Mung shawa hkrum zup hpawng ngut ai hpang, shana maga hkying 4 daram hta Myen hpyen Jet n bungli hte Chihpwi mare hta bawm 4 lang wa jahkrat bun kau da ai lam chye lu ai.
Chihpwi muklum hpe tat sum kau ai Myen hpyen gumshem dap gaw Chihpwi mare de shani shagu ngu na n bungli hte bawm wa jahkrat bun taw nga ai re.
Myen hpyen dap kaw na ya na zawn n bungli hte shani shagu bawm wa jahkrat bun nga ai majaw ginra masha ni nam de sha makoi hprawng yen taw nga ai re.