Waimaw, Wuyan Pyithusit hpyendap hpe makawp ai hku nna hpyendap hpe shinggrup let backhole hte gaduk htu kau ai lam chye lu ai.
Wuyan hte Hkakrum mare kahtawng hta Myen hpyendap hte Pyitutsit pawnghpawng hpung ni gaw mare kata lam pat di kau nna bangga gaduk htu nhtawm shara mi hta hpyen n-gun marai 10 daram hpe jahkrat da ai lam chye lu ai.
July 17 ya shani hta Wuyan Pyitutsit dap wang hpe masha tsap mi daram sung hkra htu shing grup kau sai lam, Waimaw ginra kawa la langai KNG hpe tsun dan wa ai re.
“lam htu di ai hku gaw nrai sa,shanhte na Pyitutsit wang kum hpan grup grup yin yin ga htu ai she re. dai hku rai jang she, Pyitutsit makau grup yin na nta nkau hkra ai ni mung byin ai ka rai nga ai. shanhte gaw ya hpyen masa hpe yu ai shaloi 58 hte grai ni wa sai re majaw shawnglam post mung dai sha bai rai sai re majaw shimlam grai shagreng wa ai ka rai nga ai”
Waimaw ginra hta hpyen dap lahkawng maga hpyen masa shaja hkat taw nga ai majaw Myen hpyen dap maga laja lana shim lam shagreng taw ai re lam chye lu ai.
Hk-L-Y 58 Myen hpyendap jung Hkakrum mare hte Wuyan mare lahkawng hta Myen hpyendap hte Pyitutsit ni gaw mare kata lam pat dap jung shara jahkrat nga ai majaw, ginra masha ni hkawm sa hkawm wa n mai yak hkak hkrum nga ai re.
Ndai masa hta Waimaw ginra masha ni gaw pru hkawm sa na matu grai yak hkak mat ai lam, Waimaw Wuyan ginra masha langai mung matut tsun ai re.
“kalang lang gaw nshalai ai shara mung nga ai. lai sa lai wa ai rai yang mung lawan bai pru lai wa ra ai. lakang lang gaw tsep kawp nlu lai ai. jep ai mung grai jep ai lu. Wuyan mare kaw gaw grai jep ai. gate kaw gaw lai wa lai sa yawng hpe jep ai. nkau ni hpe hkap gayet hkap bye katut ai ni mung lawm ai. Gate bai galaw jat rai jep bu si nga ai”
Pyitutsit maga shawoi n-nga ai N-nyen Hka mahkrai kaw du hkra gaduk htu nna, Wuyan mare kata de du hkra dap jung shara jahkrat shimlam shagreng da ai majaw, Waimaw ginra masha ni lai sa lai wa na matu grai yak hkak nga ai mung rai nga ai re.
Dai Pyithutsit dap shara ni hta masat da ai a ten lai wa ang ai mung masha ni hpe ladu shalai san jep, rim adup zingri ai lam ni galaw nga ai hpe matut chye lu ai re.
Lai wa sai shata masum daram kaw nna Waimaw ginra kaw majan byin ai majaw hpyen koi yen hkawm nga ai mung shawa n-kau ni mung hpyen koi yen ladaw na wa n-na tinang a dum nta de jahkring jahkra gan wa mayu ai raitim ya na zawn mare kata dap jung shara jahkrat da ai marang e, wa gawan mung nmai rai mayak hkrum nga ma ai re.