Nawng Cho mare kaba Myen hpyen Myawk dap kaba (606) hpe Balawng TNLA hte Mandalay PDF pawng hpawm dap ni htim gasat kau ngut ai hpang, Nawng Cho mare kaba yawng hpe TNLA dap ni zing madu da lu sai re.
Dai myawk dap hpe July praw 10 ya shani htim gasat zing madu kau lu wa nna, dai dap shara hpe htim gasat ai shana hta Myen hpyen dap maga nbungli hte laja lana wa htim gap gasat wa ai re.
Dai dap shara hpe Balawng TNLA hte PDF pawng hpawm dap maga a tsawm sha yawng seng kau nna, Nawng Cho mare hpe a tsawm sha up madu da lu sai nga tsun ai.
Nawng Cho mare kaba hpe lai wa sai June 25 ya shani kaw na htim gasat hpang wa ai gaw, nhtoi 16 ya na ai hpang zep kawp zing madu la lu wa ai mung rai nga ai.
Nawng Cho mare hta Myen hpyen dap Hk.M.Y (114) (115). Amyawk dap (606) dap kaba masum jung tawn ai mare kaba langai rai nna, dai dap shara yawng hpe Balawng TNLA hte Mandalay PDF dap ni pawng hpawm nna htim gasat kau lu ai rai nga ai.
Matut na rai tim dai ginra mayan de Myen hpyen dap hte Balawng TNLA PDF pawng hpawm hpung ni hte majan matut laja taw nga nna, lam lapran mung shawa mun lam pat hkrum taw ai lam ni nga taw ai re.