Manmaw muklum kata ndai hkying hkum 24 laman hka kaba tung wa mai ai majaw, lamu ga nem ai shara hta nga ai ni, aten dep lawan htawt sit na matu, lamu marang yu maram dap kaw na ndau shana da ai re.
Manmaw mare kaba hta dai ni shani ka-ang ten du hkra rai yang, 1121 cm wa du nga sai rai nna, Manmaw mare kaba a hka shadawn tsang ra madang 1150 madang kaw re lam chye lu ai.
Dai hta grau na hkrit tsang ra na madang gaw 1245 Cm madang rai nna, dai hta grau tsaw na masa nga ai lam, lamu marang yu maram magam dap na tsun da ai re.
Hka rai n kaba wa shi ai rai tim, lamu ga nem ai shara de na mung shawa hkying mi jan hpe garum ningtum hpung ni htawt sit da ya lu sai lam matut chye lu ai.
Lai wa sai 2004 ning Manmaw mare kaba hta Malihka tung kaba wa ai shadang 1338 madang wa du ai re lam sagawn chye lu ai.
Ya ten lamu ga nem ai shara hte hka kau mayan hta nga ai mung mare masha ni hpe shim ai shara ni de htawt sit da ya ai ni mung nga sai rai nna, hka hpyen hkrum wa na tai ai mung shawa law malawng hpe hpaji jawng wang ni hta shara wa jahkrat da ya ai lam chye lu ai.