Nmawk hte Manje Mare Myen hpyen dap kaba hpe dai hpawt manap hkying 6 daram kaw na numdaw kalang bai htim gasat nga ai majaw, majan laja lana gap gasat hkat taw nga ai lam, shawng lam hpyen shi sawk ni kaw na chye lu ai.
Nmawk hte Manje Makau grupyin hpe Wunpawng Mungdan Shanglawt Hpyendap KIA woi awn ai pawng hpawm dap maga de na, May praw 6 ya jahpawt kaw na htim gasat hpang wa ai gaw, dai ni ten du hkra majan laja taw nga ai re.
May 13 ya jahpawt hkying 6 daram aten kaw na Manje Myen hpyen dap Hk.M.Y (319) hte (601) dap hpe htim gasat taw nga nna, lahkawng maga laja lana gap gasat hkat taw nga ai hta, laknak kaba si a majaw, mare dum nta nkau wan hkru hten taw nga ai re.
Manje mare grup yin hpe shim la la da ya ai dap shara yawng ngu na ram hpe KIA htim gasat zing kau lu sai rai nna, ya ten mare kata dap jung da ai Myen hpyen dap shara hpe htim gasat taw ai mung rai nga ai.
Dai dap shara ni hpe htim gasat ai hta, Myen hpyen dap maga de na nbungli bawm ni hte mung laja lana wa gap sharu bun ai lam ni nga taw ai re.
Matut na Nmawk mare Myen hpyen dap Hk.M.Y (437) dap hpe mung dai hpawt hkying 7 daram ten kaw na, laja lana bai sa htim gasat taw nga sai re.
Nmawk mare shara law malawng hta KIA dap up madu da lu sai rai tim, mare kata naw ngam nga ai dap kaba hpe matut htim shagrawt taw nga ai re.
Nmawk mare kata mung shawa dum n’ta hte hpaji jawng, hpyen yen dabang makau hkan dap jung nga ai myen hpyen hpung ni yawng hpe jasan kau lu sai lam ginra masha ni tsun dan ai kaw na chye lu ai.
Ya matut ngam nga ai Nmawk Hk.M.Y (437) hte Manmaw Deng 4 shara ni hta laja lana gap gasat hkat taw nga ai lam matut chye lu ai.
Ya ten KIA hte Pawng hpawm dap maga, Manje, Manmaw, Nmawk mare kaba ni hta dap jung ai Myen hpyen dap ni hpe htim shagrawt taw nga ai zawn, Myen hpyen dap maga na mung, mare kaba ni hpe n tat sum hkra, laknak kaba hpan hkum ni hte gap garum nga ai zawn, nbungli hte hpyen n-gun sa ai lam ni mung nga taw ai lam, shawng lam hpyen shi sawk ni tsun da ai re.