Sezin Myen hpyen dap hpe htim gasat ai hta, majan ten laman dai mare na mung shawa dum n’ta 20 jan wan hkru hten wa ai lam ginra masha ni tsun ai re.
Sezin Mare baw Myen hpyen dap Hk.M.Y (116) dap hte Sam Hkyeng SNA pawng hpawm dap hpe KIA hte PDF pawng hpawm dap ni num daw lahkawng lang ngu na sa htim gap gasat zing ai hta, ya na zawn mung shawa dum n’ta 20 jan wan hkru hten hkrum ai nga, dai ginra na mung shawa langai KNG shiga dap de tsun dan wa ai re.
“Madung gaw dai Myen hpyen dap hte ni ai hkan na n’ta ni rai nga ai, yawng la hpa n nga hkra hten mat ai, dum n’ta hten ai law malawng gaw laknak kaba si a majaw re ngu mu ai. ya Sezin kaw ndai kalang bai hten hkrum ai gaw N’ta 20 jan re.” nga tsun ai.
Madung wan hkru hten ai dum n’ta ni gaw, Myen hpyen dap shara hte ni ai dum n’ta ni rai nna, laknak kaba hte nbungli bawm a majaw, hten za hkrum ai nta ni re lam chye lu ai.
Sezin Mare hpe lai wa sai April 10 ya shani kaw na 23 ya shani du hkra htim gasat zing madu wa ai rai nga ai.
Ya ten dai shara ni hta, Majan ten laman na laknak a-ngaw a-ngam ni hte bawm jasan ai lam ni rai n lu galaw shi ai majaw, mung mare masha ni hpe dum n’ta wa ahkang rai n jaw shi ai re lam chye lu ai.