N’tara rim sharen da hkrum ai, Sara Kaba Hkalam Sam Son hpe, dai ni Myen shaning ningnan n’htoi shani hta lawt pru wa sai lam chye lu ai.
Sara kaba lawt pru wa na matu, PCG ni shakut shaja wa ai re nga Myitkyina htawng hte ni nawn ai sara langai KNG de tsun dan ai re.
“Sara Kaba lawt wa sai, ya anhte hte rau Canteen kaw rau rai sai, PCG ni grai shakut shaja wa ai majaw lawt pru wa sai” nga tsun ai re.
Sara Kaba hpe PCG, YCC, hte dum n’ta masha ni Myitkyina Htawng kaba hta sa tau la nna, KBC Ginjaw rung de woi wa nna, KBC hte ni nawn ai buga na hpung shawa ni hkap tau hkalum wa ai re.
Rev.Dr Hkalam Sam Son hpe lai wa sai 2022 ning December praw 6 ya shani, Mandalay nbungli pa hta Myen hpyen dap rim woi mat ai re.
Mandalay nbungli pa kaw na Myitkyina htawng de htawt sit kau ai hpang, tara kanu gabaw amyu myu shatut let, htawng dam 6 ning jahkrat da hkrum ai rai nga ai.
Sara kaba gaw, Myitkyina htawng kata laning mi shata manga, rawng kau da nna, dai ni Myen shaning ningnan shani shalawt dat ai hta lawm pru wa ai rai nga ai.
Myen hpyen dap shaning ningnan bawng masha shalawt ai hta, Jinghpaw mung hkring Usa lahkawng mung lawt pru wa sai re.
Dai yan lahkawng gaw, Masha pru shang hkring mang, U Zaw Win hte, Lu Mu Ye Wungyi U Nay Win yan re lam chye lu ai.
Myen hpyen dap shaning ningnan bawng masha shalawt ai hta Myen mungdan ting na, yawng 3303 shalawt ai lam ndau da ai re.