Namya mare Myen hpyen dap shara hpe Wunpawng Mungdan Shanglawt Hpyen dap zing madu kau sai rai tim, Mare kata bawm jasan ai lam ni rai n lu galaw shi ai majaw, mare de rai n shang shangun shi ai re lam chye lu ai.
Namya Myen hpyen dap hpe KIA dap maga lai wa sai bat April 11 ya jahpawt zing madu kau lu sai rai tim, mare masha ni dai ni ten du hkra nam maling de naw hprawng yen taw nga ai rai nna, malu masha hte garum ningtum lam ni ra ahkyak taw nga ai nga, hpyen yen ni hpe yu lakawn taw ai Sara langai KNG shiga dap de tsun dan wa ai re.
“Ya du hkra gaw mare de rai n shang shangun shi ai, bawm ni a tsawm rai n lu jasan shi ai nga, dai ni jawm gaw n’ta langai na marai langai hpe wa du kawan shangun ai, ya du hkra gaw nam de hprawng yen taw nga ai, malu masha ni gaw buga hpung kaw na mai byin ai hku naw woi lajang taw ai,” nga tsun ai re.
Namya Myen hpyen dap hpe htim gasat ai nhtoi masum ya laman hta Namya mare kata na mung shawa dum nta 12 wan hkru hten mat nna, laknak kaba si a majaw rawng n mai mat hkra hten ai dum nta gaw, 13 re lam chye lu ai.
Dai hta nkau dum nta hte, nawku jawng wang ni hta mung sinat laknak si wa hkra ai rai tim loi li gram lajang la yang, matut naw mai rawng ai lam matut tsun dan ai re.
Ya na zawn dum nta n lu mat sai mung mare masha ni, tinang rawng na dum nta ni hpe bai gaw gap la lu na matu, garum ningtum lam ni matut ra ahkyak taw nga ai lam chye lu ai.
Dai ni April 17 ya shani hta, nam de hprawng yen taw nga ai mung shawa ni hpe, gadai mung gade na nta wa yu na matu, nta hting gaw langai na marai 1 hpra wa na ahkang jaw da nna, tinang dum nta hta laknak si taw n taw sadi let wa yu na matu ahkang gan jaw da ai lam chye lu ai.
Ya ten Hpakant lam hpe laknak lang wuhpung lahkawng maga de na matut pat da taw ding yang rai nna, dai ginra ni de malu masha ni mung yak hkak wa taw nga ai re lam chye lu ai.