Myitkyina Putao lam kaba pat da ai nhtoi, shata mi jan na wa ai hte rau Putao mare kaba hta malau masha gunrai hte Jak sau ni dum hprut taw nga sai lam ginra masha ni tsun ai re.
Myitkyina Putao lam kaba pat mat ai hpang, Putao mare kaba hta jak sau ni hpe shadawn sharam hte sha dut ya mat ai hpang, April 10 ya shani kaw na gaw sau seng ni yawng tsep kawp pat mat sai nga, Putao ginra masha langai KNG shiga de tsun dan ai re.
“Jak sau ni yawng tsep kawp dum hprut mat ai masa rai mat sai, mi shawng e htaw da ai jak sau ngam ni hpe sha dut garan jaw taw ai gaw, nhtoi shata mi jan na wa ai hpang yawng ma mat sai, ya shinggan lam makau hkan loi li gaw dut ma ai, tau mi 15,000 nga grai manu laja ai, ra ai daram mung n mai mari mat sai,” nga tsun ai re.
Putao hta lam pat mat ai hpang, jak sau gah lan mi Mun 6, tau mi hta mun mi, manu nga ai rai nna, April 10 ya shani kaw na sau dum hprut mat sai majaw, hkawm sa ai masha n nga mat ai daram byin taw sai nga ginra masha ni matut tsun ai re.
Jak sau dum hprut mat ai majaw, Putao ginra hta nga ai mung mare masha ni galaw lu galaw sha lam hte hkawm sa hkawm wa lam ni hta yak hkak taw nga ai re.
Jak sau dum hprut mat ai majaw, nkau mung shawa ni lagaw lam hte hkrun lam galu hkawm sa taw nga ai zawn, moi kaw na tawn da ai lagaw len ni hte hkawm sa taw ai ni mung nga ai lam chye lu ai.
Ya ten Putao muklum kata hta, Bahkrisi tawng mi hta hkying mi ram nga ai rai nna, shakau hpraw joi mi 20000, n-gu buri mi 150,000, Udi 3 na 5000 manu nga ai re nga tsun dan ai re.
Ya na zawn Putao ginra de nga ai mung shawa ni grai yak hkak jam jau wa ai majaw, mawdaw yawng hpe n shalai ai rai tim, gun ra htaw mawdaw ni hpe gaw shalai shangun mayu ai nga, ginra masha ni tsun ai re.
Myitkyina Putao lam kaba hpe lai wa sai March praw 7 ya shani Sumprabum Myen hpyen dap hpe htim gasat hpang wa ai ten kaw na pat mat ai gaw, dai ni ten du hkra rai nga ai.