Sagaing hte Jinghpaw mung jarit mayan na KIA woi awn ai hte PDF pawng hpawm dap ni htim gasat zing madu da ai Mawlu hte Shwepyi Aye mare kaba ni hpe Myen hpyen dap ni kalang bai htu shadut htim gasat na matu hkyen shajin taw ai lam ginra masha ni kaw na chye lu ai.
2023 ning November shata hta KIA woi awn ai PDF pawng hpawm dap ni htim gasat zing madu da ai Mawlu, Shwepyi Aye ginra ni de hpyen n-gun kaba hte kalang bai htim gasat na matu, hpyen shamu shamawt taw nga ai nga, Hummalin PDF na lit nga ai magam gun langai KNG de tsun dan wa ai re.
“Myen hpyen dap Shwepyi Aye hpe bai htim gasat na matu lai wa sai January shata kaw na hkyen shajin taw nga ai re, ya hte kalang htim gasat wa ai sum machyi na bai htingnut mat ai, ya mung hpyen n-gun jat na matut shamu shamawt taw nga ai ma ai, kalang bai htim gasat na matu hkyen taw ai ngu mu mada ai.” nga tsun ai re.
Dai ginra ni de htu shadut htim gasat na matu lai wa sai January shata kaw na hkyen shajin taw nga nna, lai wa sai January 25 ya shani Shwepyi Aye muklum hpe htim gasat nna, Myen hpyen dap maga sum machyi lam law wa ai majaw, bai hting nut mat ai re.
Shwepyi Aye mara kaba hpe bai lu zing hkra Myen hpyen dap shakut nga ai hta, Hku Taung, Mayzali, Naung San Kyin mare maga de na shang lu hkra shakut taw nga nna, shan hte shang wa na lam hpe laknak kaba, nbungli ni hte gap bun re ai lam ni a majaw, Mayzali hte Naung San Kyin mare hkan na mung shawa dum n’ta hten hkrum wa ai re.
Dai zawn sha Mawlu mare kaba hpe bai lu zing madu na matu lai wa sai 10 ya daram kaw nna, hpyen shamu shamawt ai lam hte hpyen n-gun jat ai lam ni ding yang galaw taw nga ai lam, dai ginra na PDF lit nga ai ni tsun ai re.
Hpyen shamu shamawt wa ai Myen hpyen dap ni hpe KIA PDF dap aga hkap shingla gasat ai majaw, majan jahkring hkring byin taw nga ai re.