Munggu mare hta sa hprawng yen nga ai hpyen yen mung shawa ni hpe Kokang MNDAA dap ni, dai hpawt manap sa gau shapraw taw ai lam chye lu ai.
Munggu lawk (4) kaw, 3 ning jan sa hprawng yen taw nga ai Kawng Lung mare na Jinghpaw htinggaw 15 hpe Kokang MNDAA dap ni gaw, February 17 ya, dai hpawt kaw na sa gawt shapraw taw ai lam, munggu ginra masha ni tsun ai re.
“Dai hpyen yen ni gaw lai wa sai 2021 ning hta, Kokang dap ni Munggu de majan baw shang wa ai majaw, hprawng yen pru wa ai ni rai nga ai. Ya nta galaw taw ai, rai n ngut shi ai. Nta ngut jang wa na ngu tsun tawng ban ai rai tim, n hkraw ma ai,” nga nna, Munggu ginra masha langai KNG shi ga dap hpe tsun ai re.
Ndai Hpyen yen ni gaw, lai wa sai 2021 ning hta Myen hpyendap the Kokang MNDAA lapran Majan a majaw, Kawng Lung kaw na, Mungggu mare kaba de hprawng yen machyu nga ai ni re lam chye lu ai.
Majan zim ai hpang, mare de wa na matu Myen hpyen dap hte jahkrup bawng ban wa ai rai tim, mare hta nan, Myen hpyen dap dung ai majaw, dum nta wa n mai nna, Munggu kaw matut shingbyi nga ai re lam chye lu ai.
Dai hpang, 2023 ning November shata hta gaw, 1027 majan masing hte dai ginra na Myen hpyendap ni hpe Kokang MNDAA dap ni htim gasat majan baw ai ten, Kawng Lung mare gaw drone, Bawm, lak nak kaba ni hte, yawng hten za mat sai lam tsun ai re.
Majan a majaw, mare yawng hten za mat tim, dai ginra hpe lit la nna Bawm jasan ai lam, n galaw ya ai majaw, Kawng Lung mare masha ni gaw, Munggu kaw sha, shingbyi nga ra ai re lam ginra masha langai mung ndai zawn tsun ai re.
“Ndai ginra hta lai wa sai 2023 ning November shata kaw na majan bai laja wa ai hte rau gaw, Myen hpyen dap hpe gasat ai nga yang dap makau kaw nga ai Kawng Lung mare ting dum nta yawng hkra hten mat ai, n kau mi hpa n nga sai, n kau mi naw nga ai rai tim rawng n mai mat sai, ngut na mung dai ni ten du hkra dai shara hpe gadai mung bawm seng ya ai lam n nga ai, dai majaw mare masha ni gaw, laga shara ningnan tam nna n’ta gap taw ai, rai n ngut shi ai majaw n wa shi ai re,” nga matut tsun dan wa ai re.
Kawng Lung Mare na, hpyen yen mung mare masha ni hpe ya ten gadai gara wuhpung kaw na garum ningtum jaw ai lam n nga ai hte tinang mai byin dang di ai hku na shara ningnan bai tam let dum nta ni hpe gaw gap la taw nga ai re.
Ya na zawn dum nta gaw gap ai lam rai n ngut kre shi ai ten Kokang dap maga de na maja sa gawt shapraw hkrum wa ai rai nga ai.
1027 majan a majaw, Munggu ginra hta Kawng Lung hte Man Ha mare gaw tsep kawp hten mat ai mare rai nna, mare ningnan bai gaw gap la ra ai re.
Kawng Lung mare gaw Munggu hte Hpawng Seng lapran, Munggu hte deng 3 daram tsan ai shara re lam chye lu ai.