Manje hte Manwin lapran, Kaihtik Myen hpyen dap kaba hpe Wunpawng Mungdan Shanglawt Hpyendap KIA htim gasat zing kau sai lam, shawng lam hpyen shiga sawk ni kaw nna chye lu ai re.
Kaihtik Myen hpyen dap hpe January 28 ya shani ga-ang ten kaw nna, laknak kaba drone ni hte sa htim gap gasat ai hpang, Myen hpyen dap ni hprawng yen mat ai re lam, shawng lam hpyen magam gun langai KNG hpe tsun dan ai re.
“Kaihtik hpe gaw mani hkying 12 kaw na gasat hpang ai rai nga ai, law malawng gaw drone sinat kaba hte gasat ai, shan hte ndang hkam na yen mat ai rai nga ai, dai hpawt gaw yawng lu zing kau sai,” nga nna tsun dan wa ai re.
Ya htim gasat zing madu kau lu ai Myen hpyen dap kaba gaw, Kaihtik ginra hta kaba dik Myen hpyen dap kaba re lam chye lu ai.
Manwin Myen hpyen dap hpe htim gasat zing madu kau ai hpang, Kaihtik Myen hpyen dap hpe bai htim gasat wa ai rai nga ai.
Ya ten, Manwin hte Manje lapran shara law malawng hpe KIA dap maga htu shadut htim gasat taw nga ai majaw, dai ginra hta hpyen masa shaja hkat taw nga ai sha n’ga, Manmaw mare kaba hta mung mung shawa ni hpe rim ahkyak la ai lam ni galaw taw nga ai re.