Jinghpaw hte Sammung jarit, Mabing ginwang Nga Oo hte Mabing mare lapran mawdaw lam kaba hta Myen hpyendap jet nbungli hte bawm sa jahkrat bun ai hta hkrun lam hkawm mawdaw langai hta wa hkra kapaw ai majaw, mung shawa marai 2 si ai nna, marai 3 hkala hkrum wa ai lam, ginra masha ni kaw na chye lu ai.
December praw 6 ya shana hkying 1 daram hta, KIA Dung 12 ginra Nga Oo hte Mabing lapran, Hku Tah mare makau na mawdaw lam kaba hta, Myen hpyen jet n bungli hte laknak kaba sa jahkrat bun ai majaw, hkrun lam hkawm mung shawa si hkala hkrum wa ai nga, dai ginra na mung shawa langai KNG shiga dap hpe tsun dan ai re.
“Htichyaik lam pat da ai majaw, n dai lam hku na rai wa ai nga yang nbungli bawm hkrup ai ga rai nga ai, dai kaw mawdaw gau ai wa hte mawdaw hpang hkan ai yan si nna, hkrun lam hkawm ai nig aw sha hkala ai, hkala sawng ai langai lawm ai, Sagaing de sha htaw yu mat wa sai,” nga tsun dan ai re.
Si mat ai la marai lahkawng gaw, mawdaw gau ai wa hte mawdaw hpang hkan ai wa yan rai nna, Katha Pyin Htaung Lay mare kaw na re lam, chye lu ai.
Dai ginra hta majan byin ai lam nnga ai rai tim Myen hpyen dap ni kaw na ya na zawn laknak kaba si sa jahkrat bun wa ai re nga, PDF magam gun langai matut tsun dan ai re.
Ya ten dai ginra hta, Myen hpyen dap hte KIA woi awn ai PDF pawng hpawm dap ni lapran hpyen masa matut shaja hkat taw nga ai re lam chye lu ai.