Mungnyang Ginwang Balu mare hte Namawn lam lapran na Myen hpyen dap shara langai hpe, KIA Dung 35 hte PDF pawng hpawm dap ni sa htim gap gasat zing kau lu ai lam, ginra masha ni kaw nna chye lu ai.
December praw 5 ya jahpawt jau hkying 3 daram kaw sa htim gap gasat ai gaw, dai na maga de du hkra majan laja wa ai rai nna, Balu Hka Wan Jak makau na Myen hpyen dap shara hpe zing madu kau lu ai lam, KIA hte ni nawn ai ginra masha langai KNG shiga dap de ndai zawn tsun dan ai re.
“Myen hpyen nbungli makawp maga dap dai Balu mare kaw nga ai re. Drone pyenli dap ni hpe madung shim lam la ya nga ai dap shara hpe htim gasat zing kau sai nga na ai,” nga tsun dan ai re.
Dai Myen hpyen dap gaw, lai sa lai wa ni hpe ladu lai san jep nna, n dai laman hta KIA PDF dap ni hpe grau grau shagyip wa ai majaw, sa htim gap gasat ai re lam, shawng lam magam gun ni tsun ai re.
Balu Hka Wan Jak Myen hpyen dap hpe sa htim gap gasat zing ai hta, Myen hpyen dap maga sum machyi lam hte laknak machyu pala padang dip la lu ai lam nga ai rai tim, a tsawm tup hkrak grai nchye lu ai re.
Dai Myen hpyen dap gaw, Mungnyang ginwang hte Nawng Lut ginwang lapran hta nga ai dap kaba rai nna, hkawm sa hkawm wa lam hta madung ahkyak ai dap shara mung rai nga ai.