Pangsai mare kaba hta November 19 ya shani Kokang dawng hkawn hpe sharawt da lu sai raitim, majan matut byin taw nga ai lam, ginra masha ni tsun ai re.
Pang Sai mare hpe lai wa ai October 30 ya shani hta kalang Kokang dap ni sa htim gap gasat zing madu kau da nna, bai pru mat wa ai hpang, Myen hpyen dap ni bai wa dung taw ai majaw, November 15 ya shani hta kalang bai drone hte shawng sa htim gap gasat hpang wa ai kaw na majan bai laja matut byin nga ai re.
“Kokang dap ni Myen hpyen la ni hpe hkan shachyut gap, Myen hpyen la ni gaw, mung shawa nta hkan gawp makoi hkawm, gara de nga yang gara de hkan gap, mare ting yawng hten ma sai.” nga nna, ginra amyu shayi langai KNG hpe tsun dan ai re.
Kokang dap maga de na drone hte dai zawn hkan shachyut gap ai majaw, mung shawa marai 2 si hkrum nna, hkala hkrum ai ni mung law law nga taw ai lam matut chye lu ai.
Ya ten Pangsai mare hta Myen hpyen dap hte Kokang dap majan laja lana gap gasat hkat taw nga nna, Myen hpyen dap maga n-gun kaba hte matut shaja nga ai zawn, deng 105 maga de nna laknak kaba ni hte ding yang gap garum taw nga ai lam, ginra masha ni matut tsun ai re.
Pangsai mung shawa ni yawng hpe Myen Miwa jarit ငြိမ်းအေးမြေ ngu ai htap 5 re n ta kaba hta sa du hprawng yen taw nga nna, malu masha dumhprut wa taw nga sai lam, hpyen yen mung shawa ni tsun ai re.
Dai nta kaba hta Pangsai mare ting na mung mare masha hkying lam sa du hprawng yen taw nga ai majaw, hka hte namdum yak hkak taw nga ai lam, matut chye lu ai.
Ya ten hpyen yen ni nga ai dai nta kaba shawng hta Kokang dap ni sin taw nga ai majaw, Myen hpyen dap maga laknak kaba ni gap shadam bun wa na hpe myit tsang ai lam tsun ai re.
1027 majan masing hta Myen-Miwa ga jarit Munggu, Pangsai, Chin Shwe Haw dai mare jarit mare kaba ni hpe Kokang dap ni zing madu da lu sai re.