Mogaung, Sahmaw sinpraw maga, Tsapba Bum Myen hpyen dap hpe KIA-PDF pawng hpawm dap ni, November 11 ya shani, htim gasat zing madu kau sai lam, ginra masha ni tsun ai re.
November 10 ya jahpawt hkying 10 daram aten, KIA-PDF pawng hpawm dap ni sa htim gap gasat ai hpang, November 11 ya shani ga-ang hkying 12 daram aten, tsep kawp htim gasat zing kau ai hpang, Sah Maw Myen hpyen dap Hk.L.Y 105 hpe Drone hte bai sa gap bun ai nga, Mogaung PDF dap tsun ndau da ai re.
“Tsapba bum Myen hpyen dap hpe htim gasat zing ai, dai hpang, Sah Maw Myen hpyen dap hpe Drone hte bai gap ai, hpyen n-gun ni grai du wa ai, dai hpang mare de laknak kaba gap bang ma ai,” Mogaung PDF dap ni lit nga ai ni tsun ai re.
Sah Maw Myen hpyen dap Hk.L.Y 105 dap hpe Drone hte sa gap bun ai hta Myen hpyen dap maga marai 4 hkala hkrum wa ai hpang, mare kata de laknak kaba gap shadam bun wa ai nga ginra masha ni matut tsun ai re.
Dai zawn laknak kaba gap shadam bun ai majaw, mung shawa marai 3 si nna, marai 7 hkala hkrum wa ai hte, nta 4 mung hten mat ai lam chye lu ai.
Laknak kaba si a majaw, asak 60 ning daram re Slg Thant Zin hte Slg Kareng Naw ni rai nna, hkala hkrum ai ni hpe ya ten Mogaung mung shawa tsi rung hta tsi tsi hkam la taw nga ai lam chye lu ai.
Ya ten Sah Maw mare hta Myen hpyen dap kaw na gap shadam dat ai, n kapaw mat shi ai laknak kaba ni naw taw taw nga ai hte, Myen hpyen dap maga hpyen n gun kaba hte mare kata shamu shamawt hkawm taw nga ai majaw, mung mare masha ni shim lam a matu myit tsang taw nga ma ai re.