Mungmyit Sinli Kutkai lahta, Tamung Nye makau Daknai Myen hpyen dap hpe, November 13 ya shana maga de hkying 2 daram hta Wunpawng Mungdan Shanglawt Hpyen dap KIA Dung 9 dap kaw na htim gasat zing kau lu sai lam, shawng lam magam gun ni kaw na chye lu ai.
Daknai Myen hpyen dap hpe, November 12 ya jahpawt kaw na, sa htim gap gasat ai gaw, lahkawng ya ngu na hta dai dap shara hpe htim gasat zing kau lu ai lam, shawng lam magam gun langai KNG shiga dap de tsun dan ai re.
“Dai ni gaw lu gasat zing kau sai, Myen hpyen la law malawng gaw si nn, n kau hprawng ai ni hpe mung bai hkan lu gap sat ai, anhte maga mung n bungli bawm hte si hkala ai lam loi li nga ai,” nga tsun dan ai re.
Dai dap shara gaw, Mungji hte Kutkai lapran dap jung tawn ai dai dap shara hta, Myen hpyen n-gun 100 daram nga ai dap shara rai nna, lai sa lai wa mung mare masha ni hpe laja lana san jep ai shara re lam matut chye lu ai.
Dai dap shara hpe htim gasat ai hta, Myen hpyen dap maga de na, Si hkala law nna, sinat laknak machyu pala alaw alam padang dip zing madu la lu ai lam chye lu ai.
Ya ten Myen hpyen dap shara law law hpe, dingdung daw dap hpawm hpung maga, htim gasat taw nga ai rai nna, Myen hpyen dap maga sum machyi taw nga ai hte, dap shara law law tat sum taw nga ai re.