Hpyen majan a majaw, Hpawngseng mung mare masha marai 200 jan, majan man hta chyat rawng taw nga ai lam ginra masha ni kaw nna chye lu ai.
October 28 ya shani kaw nna, Munggu, Hpawngseng ginra hta majan laja wa ai majaw, hprawng lam n nga, mung mare masha ni pat hkrum taw nga ai lam, dai ginra na mung shawa langai KNG hpe ya na zawn tsun dan ai re.
“Hpawngseng mare hta gaw, Miwa, Balawng, Jinghpaw yawng pawng yang marai 200 daram gaw mare kaw nan chyat rawng taw nga ai, majan byin mat ai re nga yang gaw, hprawng lam n nga mat ai, ya anhte yawng akyu hpyi nna, lam jawm tam taw nga ai.” nga tsun dan ai re.
October 29 ya shani, Man Yang Myen hpyendap hpe Kokang dap ni zing kau ai hpang, dai ni October 30 ya shani hta mung, Hpawng Seng Myen hpyen byuha dap hpe wa htim gap gasat taw nga ai re lam, chye lu ai.
Dai zawn majan laja lana htim gasat taw nga ai hta, Myen hpyen dap maga de na nbungli hte matut manoi wa htim gap gasat taw nga ai majaw, mung mare masha ni myit tsang taw nga ai lam n dai zawn matut tsun dan ai re.
“ Mani Mang Yang mare hpe gaw Kokang ni zing madu sai, laknak ni grai law hkra padang dip zing la lu ai mu ai, ya dai ni mung Hpawng Seng byuha kawng hpe htim gasat taw nga ai, majan laja taw ai re majaw, Myen hpyen ni nbungli laknak kaba hte gap bun na anhte mung mare masha ni hpe hkra na tsang ai, ding re lapran kaw nga nga ga ai” nga tsun ai re.
Hpawngseng mare hta dai ni majan laja lana gap gasat taw nga ai rai nna, Myen hpyen dap maga nbungli hte wa gap ai zawn, Munggu maga de na laknak kaba ni hte gap bun taw nga ai re lam chye lu ai.
October 29 ya shani hta mung, Myen hpyen dap maga de na laknak kaba gap bun ai majaw, Munggu Kawng Lung mare na Nawku htingnu hkra hten ai lam hte mung mare masha nta langai hpe Myen hpyen dap wan nat jahten kau ya ai re.
Myen hpyen dap maga nbungli laknak kaba hte gap shadam bun ai majaw, mung mare masha nta ni hkra hten ai lam ni matut manoi byin nga ai re lam chye lu ai.
Hpawng Seng mare Myen hpyen byuha kawng hpe lu htim gap gasat zing kau ai rai yang, Hpawng Seng ginra yawng gaw Kokang MNDAA a lata kaw rai sai lam chye lu ai.
Dai ginra hta lai wa sai 2020 ning hta mung Kokang MNDAA dap hte Myen hpyen dap gap gasat hkat wa ai hta, Kokang dap maga de na, Hpawngseng ginra ga-ang hkup daram hpe htim gasat zing la lu wa ai re.
Ya ten, Nawng Jang, Nawng Hpai, Man Ping mare kahtawng masum na mung mare masha ni, Miwa ga jarit de sa du hprawng yen taw nga nna, Lashap mare ni gaw, hka chyang hkaraw de wa hprawng yen taw nga ai lam chye lu ai.
Ya majan laja taw nga ai, Bang Mwi, Man Yang mare ni gaw, hpyen yen taw ai masum ning jan na sai rai nna, dai hpyen yen ni n ta n lu wa shi ai ten, ya na zawn majan kalang bai laja wa ai re lam matut tsun dan ai re.
Ya ten dai hpyen yen mung mare masha ni tinang lu ai malu masha hte hprawng yen hkawm nga ai rai nna, aten galu na wa ai rai yang, lam shagu hta grai yak hkak wa mai ai lam, hpyen yen mung masha ni tsun ai re.
Dai ginra hta matut nna, ndai hta majan grau laja wa ai rai yang, Miwa mung de hprawng yen bang na matu, lit nga ai salang ni Miwa asuya maga hpyi shawn bawng ban da ai lam ni nga ai rai tim, ya ten du hkra jarit chyinghka lam hku na Miwa mung de lu shang ai lam n nga shi ai re.
Munggu, Hpawngseng ginra hta, dai ni mung majan laja lana gap gasat hkat taw nga nna, Myen hpyen da maga nbungli ni hte wa htim gap gasat taw ding yang rai nga ai.