Mungmyit Sinli, Dima Mankang bum KIA Dapba 6 shara hpe Myen hpyen dap nbungli hte wa htim gap gasat ai mabyin hta hpa-awn tsang magam gun marai 1 hte kaga marai 4 asak si sum wa ai lam chye lu ai.
October 19 ya shani, Ying La Bum hpe KIA dap wa htim gap gasat zing kau ai hpang, October 20 ya shana maga hkying 4 chyen daram hta, KIA Dapba 6 hpe Myen hpyen dap nbungli hte wa htim gap gasat wa ai re nga shawng lam magam gun langai KNG shiga dap de tsun dan ai re.
“Anhte Ying La Myen hpyen dap hpe wa htim gap gasat zing kau ai, dai hpe matai dawk ai hku na anhte Dapba hpe bai sa gap ai ga rai nga ai, yawng marai 5 hkrat sum mat ai,” nga tsun dan ai re.
Nbungli hte wa htim gap gasat ai hta, Dapba 6 a shat gawk kawng marawn hta wa hkrat ang ai majaw, dai kaw shat shadu nga ai magam gun marai 5 hkrat sum mat ai nga, matut tsun dan ai re.
Dai hkrat sum mat ai hta, Salang Kaba Labang Nan Daw hte rau shat gawk hta shat simai shadu taw ai marai 4 hkrat sum mat ai rai nna, shanhte hpe October 22 laban ya shani makoi mayang sai lam chye lu ai.
Dai shani lani mi laman hta, KIA Dapba 6 ginra hpe, nbungli hte 10 lang jan wa gap bun ai re lam chye lu ai.
Ndai laman Myen hpyen dap ni shara shagu ngu na hta hpyen majan sum machyi taw nga ai majaw, nbungli hte shara shagu wa gap bun taw nga ai re.