Munglai Hkyet hta mung shawa marai 29 si sum ai mabyin hte rau, Loilum Awng Ja mayan hta Myen hpyen dap ni dai na maga n bungli hte numdaw lahkawng lang sa gap bun ai lam shawng lam magam gun ni kaw na chye lu ai.
Dai ni shani ga-ang hkying 12 daram aten kaw nna, Loilum Awng Ja Myen hpyen dap hpe KIA dap ni sa htim gap gasat ai kaw nna, majan laja lana gap gasat hkat wa ai lam chye lu ai.
Dai zawn laja lana gap gasat hkat ai hpang, shani ga-ang hkying 12:27 hta kalang, 12:48 hta kalang, 2:36 hta kalang, 3:04 hta kalang rai numdaw 4 lang sa jahkrat bun ai lam shawng lam magam gun ni kaw na chye lu ai re.
Nbungli hte sa gap ngut ai hpang, Hkaya Bum hte Bumre Bum de na laknak kaba ni hte matut gap bun wa ai lam chye lu ai.
Daina maga hkying 7 daram aten hta mung, Laiza makau grup yin hku hpyen n bungli sa sa du pyen gayin kau da ai lam chye lu ai.
Loilum Awng Ja mare hta Myen hpyen dap ni lagyim rawng nga ai hpe KIA dap maga de na Drone ni hte jahkring hkring sa gap bun ai lam ni galaw taw nga ai re.
Namsan hpyen man maga de majan laja lana gap gasat hkat taw nga ai ten, October praw 9 ya shana hkying 11 chyen daram aten hta, Myen hpyen dap maga gap bun ai Bawm kaba a majaw, mung mare masha marai 29 si nna, marai 57 hkala hkrum wa sai re.