Hpakant, Mawmung mare hta, sau bang nga ai la langai hte San Chyoi maga de na gat dut la langai October praw 5 shani ga-ang hkying 2 daram aten hta gap sat hkrum aire.
“Sau bang nga ai kaw gap sat kau ai re, gadai ni kun a tsawm n chye ai, mali lang gap bun ai, law malawng baw kaw hkrai hkra ai majaw, dai kaw nan si mat ai,” nga nna ginra masha langai tsun dan ai re.
Sau bang taw ai ten gap sat hkrum ai wa gaw, madung baw kaw hkrai gap hkra ai majaw, dai shara hta nan si mat ai nga ginra masha ni tsun ai re.
Muk hkan sa hkawm ai wa mung shawoi shi galaw taw nga ai dai muk hkan sa ai bungli hpe sha galaw nga ai rai nna, gara hku na kaning rai gap sat hkrum ai ngu hpe n chye ai lam ginra masha ni matut tsun dan ai re.
Ya gap sat hkrum ai yan gaw, lawu ga de na lung wa let, Hpakant ginra hta kan bau bungli wa galaw nga ai yan re lam chye lu ai.
Ya na zawn shan yen hpe gap sat ai gaw, gara kaw na kadai laknak lang wuhpung ni gap sat ai ngu hpe a tsawm tup hkrak n chye lu ai re.
Lam makau kaw gap sat da hkrum ai shan yen a moi mang hpe, Hpakant mung shawa tsi rung, de garum gahtau hpung ni htaw sa da sai lam chye lu ai.
Hpakant ginra hta n dai October shata n htoi manga ya lamang, seng kye hte gayin nna gat dut hkawm ai masha marai 4 sat hkrum wa sai re.