Hpakant Seng Tawng mare na Sa-Ya-Hpa Myen hpyen dap rung hpe KIA dap ni September 25 ya jahpawt hkying 4 daram aten sa htim gap gasat ai hta, Myen hpyen dap maga sum machyi lam nga ai hpe chye lu ai.
Lahkawng maga hkying hkum mi daram laja lana gap gasat hkat wa nna, laknak kaba ni hte mung gap bun wa ai re lam chye lu ai.
“Sa-Ya-Hpa rung hte Balik dap hpe sa gap gasat wa ai re. Balik dap hpe sa gap ai gaw, ning de hpyen n gun garum n sa wa lu hkra ngu ai hku na sa gap ai re. hkying hkum mi jan daram gap hkat ai.” nga nna magam gun langai KNG de tsun dan ai re.
Dau rung hpe sa gap taw nga ai ten, Balik dap hpe mung sa htim gap gasat wa ai re lam matut chye lu ai.
Dai shara lahkawng hpe sa gap ai hta, gade daram gara hku sum machyi ai ngu hpe KNG maga a tsawm tup hkrak rai n lu shaten la shi ai re.
Dai hpang dai na maga de Hpakant mung shawa tsi rung hta tsi tsi hkam la taw nga ai, စရဖ magam gun langai hte Balik marai 2 hpe mung mying n chye ai laknak lang hpung ni kaw na sa gap sat kau da ai lam chye lu ai.
Hpakant tsi rung hta tsi tsi hkam la taw nga ai ni gaw, lai wa sai, September 21 ya shani Hpakant de tsi gawk sa madun na matu yu wa ai ten, hkap gap hkrum ai hta hkala hkrum ai ni re lam chye lu ai.
Ya ten Hpakant ginra hta Myen hpyen dap hte KIA dap lapran hpyen masa ding yang shaja hkat taw nga ai lam chye lu ai.