Myitkyina-Manmaw lam kaba n tsa, Dawhpum yang mare hta sa du hprawng yeng nga ai hpyen yen mung shawa ni hta, hka shin gawk, nam dum n law nga ai sha n ga, amyu shayi lang arung arai ni ra ahkyak taw nga ai lam, hpyen yen lit hkam ni kaw na chye lu ai.
“Madung ra ahkyak taw nga ai gaw, Hka shin lawng, nam dum rai nga ai. Num La garan da ai mi nga tim hka shin gawk n law ai re nga yang, hka arau shin taw ra ai masa rai taw nga ai. ngut na amyu shayi ni na shata shagu lang ai arai mung ra ahkyak taw nga ai. ngut na langai gaw, gawk n lu garan ya ai, dai majaw, nta hting gaw nawng nawng yawng majaw na jawm yup ra taw ai, dai jawm yup ra wa yang gaw, asak ram ai num ma ni na matu yak hkak lam, shim lum lam ni yak wa ai, ya na masa hku rai yang gaw, dum nta lu gap ya na n loi ai.” nga nna hpyen yen lit hkam wa tsun dan ai re.
Dawhpum yang hta sa du hprawng yen nga ai hpyen yen mung shawa ni, shata 2 jan na wa sai hte rau, bilat n tsa hta sha mai byin ai hku nga ra taw ai majaw, hkam ja lam ni hta mung hkra machyi wa taw nga ai lam chye lu ai.
Dai hpyen yen mung shawa ni hta, n ta hting gaw nawng majaw na yup ra taw ai majaw, asak ram wa sai amyu shayi ramma ni a matu shim lum lam n nga, mayak law law hkrum nga ai lam matut chye lu ai.
Ya ten dai shara hta sa du hprawng yen nga ai mare kahtawng ni gaw, Hka Lah, Nawng Wan, Ding Jang, hte Ding Ja mare kahtawng 4 na hpyen yen mung shawa ni re lam chye lu ai.
Dai hpyen yen mung shawa ni gaw, hpyen yen ladaw shata lahkawng jan na wa taw sai hte rau, dinghku kata mayak lam ni law wa nga ai rai nna, laga shinggan de bungli galaw sha na matu mahkrun n nga ai majaw, myit tsang lam ni hte tawt lai taw nga ai lam matut chye lu ai.
Ya ten dai hpyen yen mung shawa ni ngam kau da ai buga mare kahtawng ni hta, Myen hpyen dap hte KIA dap larpran majan laja lana gap gasat hkat nga ai re.