Mogaung, Zinyaw sau seng madu yan la hpe Myen hpyen dap ni rim woi mat ai hpang, madu jan Daw Hkin Ma Shwe hpe Myen hpyen dap zingri sat kau sai lam, Mogaung ginra masha ni kaw nna chye lu ai.
Zinyaw sau seng madu Ko Moe Kyaw hte Daw Hkin Ma Shwe yan la hpe, PDF hpe garum madi shadaw ai ngu n tsen n hten ai hte, rim zingri sat kau ai re lam dai ginra na mung shawa langai KNG shiga dap hpe tsun dan ai re.
Dai yan la madu ai Myitkyina – Mogaung – Hpakant lam n tsa na sau seng 2 hte dum n ta ni hta lai wa sai September praw 2 ya shana sa rim ai hta seng magam gun marai 20 jan hpe rim woi mat nna, hpang shani sau seng 2 yan hpe bai sa jahten kau ya ai lam chye lu ai.
Rim woi hkrum ai seng magam gun marai 20 jan hpe, hparan shaw la lu na matu, Myen hpyen dap hku nna seng madu yan la hpe Mogaung balik dap hta shaga ai majaw, sa ai shaloi hkap rim woi mat ai re lam, dai ginra na mung shawa ni KNG shiga dap hpe tsun dan ai re.
“dai sau seng sa jahten ai shani dai yan la gaw gan yen mat ai rai nga ai, rai tim seng kaw na ma ni yawng lawm mat wa ai, dai majaw dai hpe sa hparan na matu sa ai, dai kaw kalang ta rim woi nna, Myitkyina M.P,Hk de sa kau ai, dai kaw na pru wa ai gade nna yang ya na zawn byin mat ai rai nga ai.” nga nna ginra masha langai tsun ai re.
Dai zawn rim woi mat ai hpang, Myitkyina Myen hpyendap san jep dabang de sa kau nna, Mogaung hkyuk de bai n htang du wa ai ten, si mat ai re lam matut chye lu ai.
Si mat ai moi mang hpe Myen hpyen dap ni sha nat kau ai re lam, matut chye lu ai.
Mogaung mare kata hta lai wa sai August 19 ya shana jawng ma sa tau ai Myen hpyen mawdaw gap gasat hkrum ai hpang, mare kata laja lana san jep ai lam n tsen n hten ai ni hpe rim woi ai lam ni galaw wa ai re
Dai zawn n tsen n hten ai majaw rim woi ai hta, Slg Wabaw Tang Gun hpe mung August 25 ya shana zingri sat kau sai re.
Ya ten Mogaung Myen hpyen dap ni rim woi da ai mung shawa marai 100 hkawt nga ai re hpe chye lu ai.