Mungmyit Sinli, Namtau–Hpahpik-Namgat Bangjung lam kaba shara 2 hta Myen hpyendap jak kaba hte bai wa htu di kau ya ai majaw, mung mare masha ni, hkawm sa hkawm wa yak hkak taw nga ai lam chye lu ai.
August 27 ya shani Myen hpyen dap kaw nna, lam ganaw jak kaba hte Namtau-Hpahpik lapran shara mi, Hpahpik, Namgat, Bangjung lam hta shara mi htu di da ya ai lam, dai ginra na mung shawa langai KNG hpe tsun ai re.
“shara lahkawng kaw htu di da ai ga rai nga ai, Namtau hte Hpahpik lapran ma htu di, Hpahpik hte Namgat, Bangjung kaw ma htu di, dai shara lahkawng kaw re ga rai nga ai.” nga nna, tsun dan ai re.
Myen hpyen dap htu di da ai lam gaw, rawt malan hpung ni madung jai lang akyu jashawn ai majaw wa htu di kau ai rai na re nga, ginra masha ni tsun maram da ai re.
Dai lam kaba gaw, 105 Mile hpe koi ai lam kaba langai rai nna, Namtau hpahpik kaw na Muse Lashio mawdaw lam kaba, Mawtawng mare hta wa hkrang ai lam kaba langai re lam chye lu ai.
Lai wa sai August 15 ya shani hta mung Natau hte Hpahpik mare mapran wa htu di kau da ya nna, dai lam hpe Mung shawa ni hte TNLA dap ni pawng hpawm nna, sa kaput shara da ai n htoi 2 ya sha naw rai yang, kalang bai wa htu di kau ya ai rai nga ai.
Myen hpyen dap kaw na ya na zawn lam wa htu di kau ya ai majaw, ginra masha ni gat sa gat wa, hkrun lam hkawm ai hta mayak manghkang ni law taw nga ai re.