Wunpawng Mungdan Shanglawt Hpung KIO Mungnyang ginwang, Hopin sinpraw hkran KIA Dung 41 shara hta KIA magam gun hte magam gun jan yan sat hkrum ai mabyin hpe gum hpraw shawa ai hte hparan shangut lu sai lam chye lu ai.
Ndai mabyin gaw lai wa sai June shata byin ai rai nna, KIA Dung 41 ni shata lahkawng laman san jep ngut ai hpang, sat hkrum ai dum nta masha ni hpe sen kyat 300 jaw let shangut kau ai re nga, Hopin mung mare masha langai KNG de tsun dan ai re.
“Shanglawt tara rung kaw na, tara daw dan ai laika hpe la wa na wa hti dan rai nna, nta masha ni hpe gaw, shanglawt asuya hte dai sat kau ai wa a lauban ni kaw na gumhpraw sen 300 hte, bunglat hka hku na rai sam ai, shangut kau ai.” nga tsun ai re.
Ndai amu hpe KIA Dapba 8 hta sha shangut kau ai rai nna, gumhpraw sen masum tsa hpe gaw KIA hte mara tawt lai ai Slg. Kyaw Tun Oo a miwa lau bau hte pawng jaw kau ai re lam chye lu ai.
N’dai amu mang hkang tawt lai ai Slg Kyaw Tun Oo hpe KIA dap ni rim jep taw nga ai ten salum gahprap n’na rim da ai bat mi laman hta a kajawng sha si malap mat ai lam, sat hkrum ai n ta masha ni hpe KIA maga hkap tsun dan ai lam, chye lu ai.
Shanglawt asuya gaw, ndai masha sat hkrum ai amu manghkang hpe, shata lahkawng laman jep joi ai lam atsawm n galaw ai sha n’ga, kata lam mabyin hte seng nna npawt ndung hkren atsawm tsun sang lang dan ai lam n galaw ai sha, tara je yang shangut kau ai lam a n’tsa shanglawt dap hpe n’gun n’lu ai lam, Hopin ginra masha wa matut tsun ding lun da ai re.
“Anhte hku na ningmu langai mi gaw, anhte yawng kam hpa manoi nga ai KIO asuya hku na, shan hte tara upade hte hkrak tara je yang ai lam tsawm ra naw ningra ai ngu mu mada ai, hpabaw ningra ai lam mu mada ai i nga yang, ပွင့်လင်းမြင်သာမှု n nga ai, ndai hpe jeyang ai hta mung shawa ni hpe n shalawm ai, mung shawa hpe hpa ahkyak n shatai ai ngu mu ai.” nga tsun ai re.
Dai sat hkrum ai KIA magam gun gaw, asak (35) ning Slg Mading Hkaw Yaw hte shi madu jan asak (34) ning re Jan Mahkaw Kaw Hpang yan rai nna, Hopin muklum hta nga ai re lam chye lu ai.